ప్రపంచ వ్యాప్తంగా అత్యంత ఆదరణ కలిగిన క్రికెట్‌ లీగ్‌ ఐపీఎల్. ఏటా దీని విలువ పెరుగుతూనే ఉంది. ప్రస్తుతం 8 జట్లతో జరుగుతున్న లీగ్‌ను 10 జట్ల(ipl 2022 new teams)కు పెంచాలని ఎప్పట్నుంచో భావిస్తోంది. దీనిపై ఇప్పటికే ఓ స్పష్టతకు వచ్చింది బోర్డు. 8 జట్లతో ఈ సీజనే చివరిదని వచ్చే సీజన్లో 10 జట్లు(2022 ipl 10 teams) పాల్గొంటాయని బీసీసీఐ కోశాధికారి అరుణ్ ధుమాల్ చెప్పేశారు. దీనికి సంబంధించిన ప్రక్రియ కూడా మొదలైందని తెలుస్తోంది. అయితే ఈ కొత్త ఫ్రాంచైజీల ధరలు చూస్తే మాత్రం షాకవ్వాల్సిందే.
"ఏ కంపెనీ అయినా రూ. 10 లక్షలు చెల్లించి బిడ్ దాఖలు చేయొచ్చు. అయితే ఆ కంపెనీ వార్షిక టర్నోవర్ రూ. 3 వేల కోట్ల వరకు ఉంటేనే దరఖాస్తు చేసుకోవాలి. ఇంతకుముందు ఫ్రాంచైజీ కనీస ధర (బేస్ ప్రైస్) రూ.1700 కోట్లుగా అనుకున్నాం. కానీ దానిని రూ.2 వేల కోట్లకు మార్చాలని ఇటీవలే నిర్ణయించాం. ఇప్పటికే కొత్త ఫ్రాంచైజీల కోసం చాలామంది ఆసక్తి చూపిస్తున్నారు. దీంతో ఈ రెండు జట్లకు కలిపి కనీసం రూ.5 వేల కోట్లు సమకూరుతాయని భావిస్తున్నాం. 14వ సీజన్లో మొత్తంగా 74 మ్యాచ్లు జరగనున్నాయి."