IPL 2022: ఇండియన్‌ ప్రీమియర్ లీగ్‌ (ఐపీఎల్) మెగా వేలంపై సర్వత్రా ఆసక్తి నెలకొంది. ఫిబ్రవరి 12, 13వ తేదీల్లో బెంగళూరు వేదికగా మెగా వేలం జరగనుంది. ఇప్పటికే పాత జట్ల రిటెన్షన్‌, కొత్త టీమ్‌లు ఆటగాళ్ల ఎంపికతోపాటు వేలం కోసం రిజిష్ట్రేషన్‌ కూడా పూర్తి అయిపోయింది. దీంతో మెగా వేలంలో పాల్గొనే ప్లేయర్ల లిస్ట్‌ను బీసీసీఐ అధికారికంగా విడుదల చేసింది. మొత్తం 590 మంది క్రికెటర్లు మెగావేలంలో పాల్గొనబోతున్నారు. ఇందులో 228 మంది క్యాప్‌డ్‌ (జాతీయ జట్లకు ఎంపికైన వారు), 355 మంది అన్‌క్యాప్‌డ్‌ (జాతీయ టీమ్‌కు ఎంపిక కానివారు), ఏడుగురు అసోసియేట్‌ దేశాలకు చెందిన ఆటగాళ్లు ఉన్నారు. ఇప్పటికే ఉన్న ఎనిమిది జట్లతోపాటు కొత్తగా లఖ్నవూ, అహ్మదాబాద్‌ ఫ్రాంచైజీలు వచ్చిన విషయం తెలిసిందే.
వెస్టిండీస్‌ స్టార్ బ్యాటర్‌, యూనివర్సల్‌ బాస్‌ క్రిస్ గేల్‌, ఇంగ్లాండ్ ఆల్‌రౌండర్‌ బెన్‌ స్టోక్స్‌ ఐపీఎల్ వేలంలో లేకపోవడం గమనార్హం. డుప్లెసిస్‌, డేవిడ్ వార్నర్, ప్యాట్ కమిన్స్, కగిసో రబాడ, ట్రెంట్ బౌల్ట్, క్వింటన్ డికాక్, జానీ బెయిర్‌స్టో, జాసన్ హోల్డర్‌, డ్వేన్ బ్రావో, షకిబ్ అల్ సన్, వహిందు హసరంగ, దీపక్‌ చాహర్, శార్దూల్‌ ఠాకూర్‌, శ్రేయస్‌ అయ్యర్, కృనాల్ పాండ్య తదితరుల కోసం తీవ్ర పోటీ ఉండటం ఖాయంగా కనిపిస్తోంది.
ఈ సారి ఐపీఎల్ మెగా వేలంలో పాల్గొనబోయే వారిలో అత్యధిక వయసు కలిగిన ఆటగాడు ఇమ్రాన్‌ తాహిర్ (43) కాగా..తక్కువ వయసు కలిగిన ఆటగాడు అఫ్గానిస్థాన్‌ అన్‌క్యాప్‌డ్‌ ప్లేయర్‌ నూర్ అహ్మద్ (17). ఈ జాబితాలో సచిన్ కుమారుడు అర్జున్ తెందూల్కర్ (బేస్‌ ప్రైస్‌ రూ. 20 లక్షలు), బంగాల్ మంత్రి, క్రికెటర్ మనోజ్‌ తివారీ (రూ. 50 లక్షలు), వెటరన్‌ బౌలర్ శ్రీశాంత్ (రూ. 50 లక్షలు) మరోసారి తమ అదృష్టాన్ని పరీక్షించుకోనున్నారు.