'తెవాతియా.. కరోనా వ్యాక్సిన్​ కనిపెట్టగలడు!'

రాయల్ ఛాలెంజర్స్ బెంగళూరు జట్టుతో జరిగిన మ్యాచ్​లో రాజస్థాన్​ ఆల్​రౌండర్ తెవాతియా పట్టిన అద్భుత క్యాచ్​కు ముగ్ధుడయ్యాడు టీమ్​ఇండియా మాజీ ఓపెనర్​ వీరేంద్ర సెహ్వాగ్​. అవకాశమిస్తే కరోనా వ్యాక్సిన్​ను కూడా తయారు చేయగల సత్తా అతడికి ఉందని కితాబిచ్చాడు.

రాజస్థాన్​ రాయల్స్ ఆల్​రౌండర్​ రాహుల్​ తెవాతియాపై టీమ్​ఇండియా మాజీ ఓపెనర్​ వీరేంద్ర సెహ్వాగ్​ ప్రశంసల జల్లు కురిపించాడు. శనివారం ఆర్సీబీతో జరిగిన మ్యాచ్​లో​ తెవాతియ స్టన్నింగ్​ క్యాచ్​కు​ తాను ముగ్ధుడయ్యానని అన్నాడు. ఈ మేరకు అతడిని ప్రశంసిస్తూ ఓ ట్వీట్​ చేశాడు.

"తెవాతియా.. మైదానంలో నువ్వు ఏమైనా చేయగలవు. కరోనా వ్యాక్సిన్​ను కనుక్కోమని నీకు ఓ అవకాశం ఇస్తే.. అది కూడా కనిపెట్టేస్తావు. ఈ సీజన్​ నీకు బాగా కలిసొచ్చింది" అని సెహ్వాగ్​ పొగడ్తలతో ముంచెత్తాడు.

ఆర్సీబీతో జరిగిన మ్యాచ్​లో తెవాతియా ఫీల్డింగ్​లో అదరగొట్టాడు. జోరు మీదున్న కోహ్లీ భారీ షాట్​ ఆడాడు. అది బౌండరీ వైపు వెళ్తుండగా తెవాతియా తుపానులా పరుగెత్తుకుంటూ వచ్చి బంతిని గాల్లోకి నెట్టేశాడు. బ్యాలెన్స్​ కోల్పోయి బౌండరీ అవతలికి వెళ్లి మళ్లీ లోపలికి వచ్చి బంతిని అందుకున్నాడు. దీంతో పలువురు క్రికెటర్లు, మాజీలు, అభిమానులు అతడిపై ప్రశంసలు కురిపిస్తున్నారు.

ఇదీ చూడండి ధోనీ నెట్స్​లో మరింత శ్రమించాలి: మియాందాద్