అయ్యో దిల్లీ: వదులుకున్నవాడే.. దెబ్బకొట్టాడు!

ఐపీఎల్​లో గురువారం జరిగిన క్వాలిఫయర్స్-1 మ్యాచ్​లో ముంబయి ఇండియన్స్ పేసర్​ ట్రెంట్ బౌల్ట్​ చెలరేగిపోయాడు. మరో పేసర్​ బుమ్రాతో కలిసి దిల్లీని కోలుకోలేని విధంగా దెబ్బతీశాడు. అయితే.. గత రెండు సీజన్లలో అతను..అదే దిల్లీ తరఫున ఆడడం గమనార్హం.

ఐపీఎల్ క్వాలిఫయర్-1 మ్యాచ్​లో దిల్లీ క్యాపిటల్స్​ను కోలుకోలేని దెబ్బ కొట్టాడు ముంబయి పేసర్​ బౌల్ట్. భారీ ఛేదనలో తొలి ఓవర్లోనే రెండు వికెట్లు పడగొట్టాడు. అయితే గత రెండు ఐపీఎల్​ సీజన్లలో అతను దిల్లీ తరఫున ఆడడం విశేషం. గత సీజన్​లో అంతగా రాణించకపోయినందున అతణ్ని ఈ ఏడాది ఐపీఎల్​ కోసం ముంబయికి అప్పగించింది. కానీ, ఇప్పుడేమో ఆ జట్టు వదులుకున్న ఆటగాడే దాన్ని దెబ్బ తీశాడు.

ఐపీఎల్​ చరిత్రలో అత్యధిక వికెట్లు తీసిన బౌలర్​గా ఉన్న మలింగ వ్యక్తిగత కారణాల వల్ల ఈ సీజన్​కు దూరం కావడం వల్ల.. ముంబయి బౌలింగ్​ బలహీనంగా మారుతుందనే వ్యాఖ్యలు వినిపించాయి. కానీ, జట్టులోకి వచ్చిన బౌల్ట్​.. బుమ్రాతో కలిసి ఆ లోటు కనిపించకుండా చేశాడు. ప్రస్తుతం లీగ్​లో అత్యంత ప్రమాదకర పేస్​ జోడీ వీరిదే కావడం విశేషం.అత్యధిక వికెట్ల వీరుల్లో బుమ్రా 27 వికెట్లతో అగ్రస్థానంలో ఉండగా.. బౌల్ట్​ 22 వికెట్లతో మూడో స్థానంలో నిలిచాడు.

ఇవీ చూడండి:తడబడిన దిల్లీ.. ఫైనల్​కు చేరిన ముంబయి