రాయల్ ఛాలెంజర్స్ బెంగళూరు జట్టుతో జరిగిన మ్యాచ్లో ముంబయి ఇండియన్స్ సూపర్ ఓవర్ వరకు వెళ్లడానికి ఇషాన్ కిషన్(99) పాత్ర కీలకం. ఈ మ్యాచ్ తర్వాత ఇతడిపై ప్రశంసలు జల్లు కురిపించారు మాజీలు, క్రికెట్ పండితులు, అభిమానులు. అయితే ఆటకు సంబంధించిన మెలకువలన్నీ కీరన్ పొలార్డ్, హార్దిక్ పాండ్యా దగ్గర నుంచి నేర్చుకుంటున్నట్లు తెలిపాడు కిషన్.
"నేను వారిద్దరితో మూడేళ్లుగా కలిసి ఆడుతున్నా. ఆటకు సంబంధించి ఎలాంటి వ్యూహాలు రచించాలో వారికి బాగా తెలుసు. కేవలం పవర్ హిట్టింగ్ గురించి మాత్రమే కాదు.. ఓ మ్యాచ్ను చివరి ఓవర్ వరకు ఎలా తీసుకెళ్లాలి, బౌలర్లపై ఒత్తిడి ఎలా పెంచాలి వంటి విషయాలను నేర్చుకున్నా. అలానే స్ట్రైక్ రొటేట్, మనం తర్వాతి చర్యను ఏమి తీసుకోబోతున్నాం అనేది ప్రత్యర్థి ఆటగాడికి తెలియనీయకుండా ఎలా తికమక పెట్టాలి వంటి అంశాలను వారి నుంచి గ్రహించా."