ముంబయి ఇన్నింగ్స్‌లో ఆఖరి ఓవర్ను స్పిన్నర్ కృష్ణప్ప గౌతమ్‌తో కేఎల్‌ రాహుల్‌ వేయించడం అందరినీ ఆశ్చర్యపరిచింది. అప్పటికే పొలార్డ్‌, హార్దిక్ పాండ్య విధ్వంసకరంగా ఆడుతున్నారు. అలాంటి పరిస్థితుల్లో 20వ ఓవర్లో బంతిని స్పిన్నర్ చేతికి ఇవ్వడం.. అభిమానులు, విశ్లేషకులను విస్మయానికి గురిచేసింది. అయితే పాండ్యకు మాత్రం నోరూరిందట!
వాస్తవంగా ముంబయి 14 ఓవర్లకు 87/3తో కష్టాల్లో ఉంది. గెలవాలంటే భారీ లక్ష్యం నిర్దేశించాల్సిన పరిస్థితి. దాంతో పొలార్డ్‌ (47*; 20 బంతుల్లో 3×4, 4×6), హార్దిక్ (30*; 11 బంతుల్లో 3×4, 2×6) దంచికొట్టడం మొదలు పెట్టారు. 19 ఓవర్లకు 166/4తో నిలిపారు. అలాంటప్పుడు ఆఖరి ఓవర్ను ఆఫ్‌స్పిన్నర్‌ గౌతమ్‌కు ఇవ్వడం పంజాబ్‌కు చేటు చేసింది. రెండో బంతిని పాండ్య సిక్సర్‌గా మలిచాడు. ఇక ఆఖరి మూడు బంతుల్ని పొలార్డ్‌ స్టేడియం దాటించాడు. ఐదో బంతికి అతడు 97 మీటర్ల సిక్స్‌ బాదేయడం విశేషం. ఈ ఓవర్లో 25 పరుగులు రావడం వల్ల ప్రత్యర్థికి ముంబయి 192 పరుగుల లక్ష్యం నిర్దేశించింది.