ఐపీఎల్లో ఆదివారం కింగ్స్ ఎలెవన్ పంజాబ్-దిల్లీ క్యాపిటల్స్ మధ్య జరిగిన మ్యాచ్లో దిల్లీ స్పిన్నర్ రవిచంద్రన్ అశ్విన్ గాయపడ్డాడు. లాంగాన్ వైపు వెళ్లే బంతిని ఆపే క్రమంలో కిందపడటం వల్ల తన ఎడమ భుజానికి గాయమైంది. వెంటనే అశ్విన్ మైదానాన్ని వీడాడు. ఈ క్రమంలో చెన్నైతో జరిగే తర్వాతి మ్యాచ్లో అశ్విన్ ఆడటం కష్టమే అనిపిస్తోంది. దీనిపై స్పందించిన దిల్లీ కెప్టెన్ శ్రేయస్ అయ్యర్.. అశ్విన్ తర్వాతి మ్యాచ్కు అందుబాటులో ఉంటాడని తెలిపాడు. అయితే ఆ మ్యాచ్లో అశ్విన్ ఆడేది, లేనిది జట్టు ఫిజియో పాట్రిక్ తుది నిర్ణయంపైనే ఆధారపడి ఉందని స్పష్టం చేశాడు.
ఈ మ్యాచ్లో తొలుత బ్యాటింగ్కు దిగిన దిల్లీ క్యాపిటల్స్ నిర్ణీత ఓవర్లలో 8 వికెట్ల నష్టానికి 157 పరుగులు చేసింది. ఆరో ఓవర్ వేసిన రవిచంద్రన్ అశ్విన్ కేవలం రెండు పరుగులు ఇచ్చి రెండు వికెట్లు పడగొట్టాడు. ఓవర్ చివరి బంతికి మ్యాక్స్వెల్ కొట్టిన సింగిల్ను కాపాడటానికి డైవ్ చేశాడు అశ్విన్. అపుడు అతడి ఎడమ చేయి నేరుగా నేలను తాకగా.. శరీర బరువంతా దానిపై పడింది. వెంటనే అశ్విన్ చేయి పట్టుకుని బాధతో విలవిలలాడాడు. ఫిజియో వచ్చి అతణ్ని బయటికి తీసుకెళ్లాడు. ఆ తర్వాత డ్రెస్సింగ్ రూమ్లో భుజంపై ఐస్ ప్యాక్తో కనిపించాడు అశ్విన్. అతడి భుజం స్థానభ్రంశం చెందినట్లుగా అనుమానిస్తున్నారు. అదే నిజమైతే అశ్విన్ ఈ ఐపీఎల్ మొత్తానికి దూరమైనట్లేనని పలువురు క్రీడా విశ్లేషకులు అంటున్నారు.