ఐపీఎల్లో ప్లే ఆఫ్ బెర్తు కోసం పోటీ రసవత్తరంగా మారుతోంది. ఇప్పటికే చెన్నై అర్హత సాధించగా మిగిలిన మూడు స్థానాలపై మిగతా జట్లు కన్నేశాయి. ఆడిన 11 మ్యాచ్ల్లో 7 గెలిచి పాయింట్ల పట్టికలో మూడో స్థానంలో ఉంది దిల్లీ క్యాపిటల్స్. 11 మ్యాచ్ల్లో కేవలం నాలుగు గెలిచి పాయింట్ల పట్టికలో అట్టడుగు స్థానంలో కొనసాగుతోంది బెంగళూరు రాయల్ ఛాలెంజర్స్.
గత మ్యాచ్లో రాజస్థాన్ రాయల్స్పై గెలిచి జోరుమీదుంది దిల్లీ క్యాపిటల్స్. 192 పరుగుల లక్ష్యాన్ని మరో నాలుగు బంతులు మిగిలుండగానే ఛేదించింది. పంత్ (36 బంతుల్లో 78 పరుగులు) చెలరేగి ఆడి జట్టుకు విజయాన్నందించాడు. ధావన్ అర్ధశతకంతో రాణించాడు. పృథ్వీ షా కూడా మంచి ఫామ్లో ఉన్నాడు. శ్రేయస్ అయ్యర్ తనదైన రోజున సత్తా చాటగలడు.
బౌలింగ్లో రబాడ, క్రిస్ మోరిస్ అద్భుతంగా రాణిస్తుండగా, అక్షర్ పటేల్, అమిత్ మిశ్రా, ఇషాంత్ శర్మ పర్వాలేదనిపిస్తున్నారు.
హ్యాట్రిక్ విజయాలతో ప్లే ఆఫ్ రేసులో తానూ ఉన్నానంటోంది బెంగళూరు రాయల్ ఛాలెంజర్స్. చివరగా పంజాబ్తో జరిగిన మ్యాచ్లో గెలుపుపై ఆశలు లేవనుకున్న దశలో అనూహ్యంగా విజయం సాధించింది. డివిలియర్స్, పార్థివ్ పటేల్ ఫామ్లో ఉండటం జట్టుకు కలిసొచ్చే అంశం. కోహ్లి నుంచి మరో భారీ ఇన్నింగ్స్ను ఆశిస్తున్నారు అభిమానులు. మిడిలార్డర్లో స్టోయినిస్, మొయిన్ అలీ ఉండనే ఉన్నారు.
గత మ్యాచ్లో మూడు వికెట్లు సాధించి ఉమేష్ యాదవ్ పామ్లోకి వచ్చాడు. సైనీ, స్టోయినిస్, మొయిన్ అలీ బాగా రాణిస్తున్నారు.