వరుస విజయాలతో జోరు మీదున్న ముంబయి ఇండియన్స్... రాజస్థాన్తో జరిగిన మ్యాచ్లో పరాజయం చెందగా... వరుస అపజయాలతో డీలా పడిన బెంగళూరు, గత మ్యాచ్లో పుంజుకుని పంజాబ్పై విజయం సాధించింది. నేడు ఈ రెండింటి మధ్య ముంబయి వేదికగా రాత్రి 8 గంటలకు మ్యాచ్ జరగనుంది.
ఈ సీజన్లో ఆరు మ్యాచ్ల అనంతరం బోణి కొట్టిన బెంగళూరు ఇదే ఊపు కొనసాగించాలనుకుంటోంది. రాజస్థాన్పై పరాజయం చెందిన రోహిత్ సేన మళ్లీ జోరు పెంచాలనుకుంటోంది.
ముంబయి ఇండియన్స్...
గత మ్యాచ్లో డికాక్(81), రోహిత్ శర్మ(47) రాణించినా.. బౌలర్లు పెద్దగా ఆకట్టుకోలకపోయారు. బ్యాట్స్మెన్ 187 పరగులు చేసినా లక్ష్యాన్ని కాపాడుకోలేకపోయింది ముంబయి జట్టు. రాజస్థాన్ బ్యాట్స్మెన్ బట్లర్ని కట్టడి చేయలేక మ్యాచ్ సమర్పించుకుంది రోహిత్ సేన. హార్ధిక్ పాండ్య, సూర్యకుమార్ యాదవ్, పొలార్డ్లతో బ్యాటింగ్ లైనప్ బలంగా ఉంది. సన్రైజర్స్ మ్యాచ్లో ఆరు వికెట్లతో ఆకట్టుకున్న అల్జారీ జోసెఫ్ గత మ్యాచ్లో ధారాళంగా పరుగులు సమర్పించుకున్నాడు. గాయంతో ఈ కరేబియన్ బౌలర్ మ్యాచ్కు దూరమయ్యే అవకాశముంది. ఎట్టకేలకు ఓ విజయం అందుకుని జోరు మీద ఉన్న బెంగళూరుపై ముంబయి ఏ మేరకు రాణిస్తుందో వేచి చూడాలి.
రాయల్ ఛాలెంజర్స్ బెంగళూరు...
పంజాబ్తో జరిగిన మ్యాచ్లో డివిలియర్స్, కోహ్లి విజృంభించి ఎట్టకేలకు బెంగళూరును గెలిపించారు. ఇదే ఊపులో ముంబయిపై విజయం సాధించి సత్తా చాటాలనుకుంటున్నారు. ఇప్పటికే పాయింట్ల పట్టికలో అట్టడుగున ఉన్న కోహ్లి సేన ప్లే ఆఫ్కు చేరాలంటే ఇక మీదట అన్నీ మ్యాచ్ల్లో గెలవాలి. ఎక్కువగా కోహ్లి, డివిలియర్స్పై ఆధారపడుతున్న బెంగళూరు జట్టులో... మిగతా బ్యాట్స్మెన్ రాణించాల్సిన అవసరం ఉంది. బౌలింగ్లో యజువేంద్ర చాహల్ టోర్నీలో 11 వికెట్లతో దూసుకెళ్తున్నాడు. వాంఖడే స్లో పిచ్ కావాడం వల్ల చాహల్ కీలకం కానున్నాడు. కానీ అతనికి మిగతా బౌలర్ల నుంచి సహాకారం అందాల్సి ఉంది. డేల్ స్టెయిన్ జట్టులో కలిసే అవకాశముంంది. దీంతో బెంగళూరు పేస్ విభాగం బలం పుంజుకోనుంది.