ఈడెన్​లో బౌండరీల వర్షం... కోల్​కతాదే విజయం

ఈడెన్​ వేదికగా ముంబయి ఇండియన్స్​తో జరిగిన మ్యాచ్​లో కోల్​కతా 34 పరుగుల తేడాతో ఘనవిజయం సాధించింది. కోల్​కతా నిర్దేశించిన 232 పరుగుల లక్ష్యాన్ని ఛేదించలేక 198 రన్స్​కే పరిమితమైంది ముంబయి జట్టు.

ముంబయి ఇండియన్స్​తో జరిగిన మ్యాచ్​లో 34 పరుగుల తేడాతో విజయం సాధించింది కోల్​కతా నైట్​రైడర్స్​. కోల్​కతా నిర్దేశించిన 233 పరుగుల భారీ లక్ష్య ఛేదనలో... ఆరంభంలోనే తడబడింది రోహిత్​ సేన. ముంబయిని ఓడించి ఐపీఎల్​లో మొత్తం 100 విజయాలు ఖాతాలో వేసుకుంది కోల్​కతా జట్టు.బ్యాట్​తో పాటు బంతితోనూ రాణించిన రసెల్​కు మ్యాన్​ ఆఫ్​ ద మ్యాచ్ అవార్డు​ లభించింది.

ముంబయి బ్యాట్స్​మెన్​​ క్యూ...

ఓపెనర్లు డికాక్​(0), రోహిత్​ (12), లూయిస్​​(15), సూర్యకుమార్​(26), పొలార్డ్​(20) తక్కువ పరుగులకే ఔటయ్యారు. దీంతో సాధించాల్సిన రన్​రేట్​ బాగా పెరిగిపోయి...మిడిలార్డర్​ బ్యాట్స్​మెన్లపై ఒత్తిడి ఎక్కువైంది.

హర్దిక్​ సంచలన ఇన్నింగ్స్​...

58 పరుగులకే 4 వికెట్లు కోల్పోయిన దశలో ముంబయి 198 పరుగులు చేసిందంటే హర్దిక్​ ఇన్నింగ్సే కారణం. 34 బంతుల్లో 91 పరుగులు(6 ఫోర్లు, 9 సిక్సులు)చేసి ఆకాశమే హద్దుగా చెలరేగిపోయాడు.విజయాన్ని అందించేందుకు శాయశక్తులా ప్రయత్నించాడు. కాని భారీ లక్ష్యం కావడం మిగతా బ్యాట్స్​మెన్ల నుంచి సరైన సహాకారం లేక విజయాన్ని అందుకోలేకపోయింది ముంబయి.

కోల్​కతా బౌలర్లలో నరైన్​, గుర్నే, రసెల్​ రెండు వికెట్లు తీయగా...పియూష్​ చావ్లా ఒక వికెట్​ సాధించాడు.

కోల్​కతాకు బ్యాట్స్​మెన్ల రక్ష...

ప్లేఆఫ్​ రేసులో నిలవాలంటే చావోరేవో తేల్చుకోవాల్సిన మ్యాచ్​లో కోల్​కతా బ్యాట్స్​మెన్లు​ బౌండరీలే హద్దుగా చెలరేగారు. 20 ఓవర్లలో 232 పరుగుల భారీ స్కోరు​ సాధించారు. దీనికి కారణం ఓపెనర్లుగా బరిలోకి దిగిన క్రిస్​లిన్​, శుభ్​మన్​ గిల్​ మంచి ఆరంభం అందించారు. క్రిస్‌లిన్‌ (54; 28 బంతుల్లో 7ఫోర్లు, 2సిక్సులు), శుభ్‌మన్‌గిల్‌ (76; 45 బంతుల్లో 6ఫోర్లు, 4 సిక్సులు) అర్ధ శతకాలతో రాణించారు.

రసెల్​ రెచ్చిపోతే...

ఆండ్రీ రసెల్‌(80; 40 బంతుల్లో 6 ఫోర్లు, 8 సిక్సులు) విజృంభణతో ముంబయి బౌలర్లు తేలిపోయారు. చాహర్​, హర్దిక్​ పాండ్య తలో వికెట్​ తీశారు. కృనాల్​ తప్ప ఒక్కో బౌలర్​ 10 రన్​రేట్​తో పరుగులు సమర్పించుకున్నారు.