సొంతగడ్డపై దర్జాగా దిల్లీ గెలుపు..

దిల్లీ వేదికగా జరిగిన మ్యాచ్​లో బెంగళూరు ఓటమిపాలైంది. దిల్లీ నిర్దేశించిన 188 పరుగుల లక్ష్యాన్ని ఛేదించలేకపోయింది. టోర్నీలో ఫ్లేఆఫ్ కోల్పోయిన తొలి జట్టుగా ఆర్​సీబీ నిలిచింది.

ఫిరోజ్​షా కోట్లా వేదికగా జరిగిన మ్యాచ్​లో 16 పరుగుల తేడాతో దిల్లీ గెలిచింది. నిర్దేశించిన 188 పరుగుల లక్ష్యాన్ని బెంగళూరు ఛేదించలేక 170 కే పరిమితమైంది. క్యాపిటల్స్​ జట్టులో శ్రేయస్, ధావన్.. అర్ధశతకాలతో రాణించారు. ప్రస్తుతం పాయింట్ల పట్టికలో దిల్లీ అగ్రస్థానానికి చేరుకుని ఫ్లేఆఫ్​కు అర్హత సాధించింది. 2012 తర్వాత దిల్లీ.. ఫ్లేఆఫ్స్​కు చేరింది ఇప్పుడే.

ముందుగా టాస్ గెలిచి బ్యాటింగ్ ఎంచుకుంది దిల్లీ క్యాపిటల్స్. ఓపెనర్లిద్దరూ తొలి వికెట్​కు 35 పరుగులు జోడించారు. అనంతరం 18 పరుగుల వ్యక్తిగత స్కోరు వద్ద పృథ్వీషా ఔటయ్యాడు. తర్వాత క్రీజులోకి వచ్చిన శ్రేయస్ అయ్యర్.. మరో ఓపెనర్ ధావన్​తో కలిసి స్కోరు బోర్డును పరుగులు పెట్టించాడు. ఆ క్రమంలోనే వీరిద్దరూ అర్ధ సెంచరీలు చేశారు. రెండో వికెట్​కు 68 పరుగుల భాగస్వామ్యం నెలకొల్పారు.

ధావన్ 50, అయ్యర్ 52 పరుగులు చేసి పెవిలియన్ బాట పట్టారు. చివర్లో వచ్చిన రూథర్​ఫర్డ్ 28, అక్షర్ పటేల్ 16 ధాటిగా ఆడి జట్టు స్కోరు 187 పరుగులు చేయడంలో సహాయపడ్డారు. మిగతా బ్యాట్స్​మెన్​లో పంత్ 7, ఇంగ్రామ్ 11 రన్స్ చేశారు.

బెంగళూరు బౌలర్లలో చాహల్ రెండు వికెట్లు తీశాడు. సైనీ, ఉమేశ్, సుందర్ తలో వికెట్ తీశారు.

అనంతరం 188 పరుగుల లక్ష్యంతో బరిలోకి దిగింది రాయల్ ఛాలెంజర్స్ బెంగళూరు. తొలి వికెట్​కు పార్థివ్- కోహ్లీ జోడి 63 పరుగులు భాగస్వామ్యాన్ని నెలకొల్పింది. పార్థివ్ 39 పరుగులు చేసి మొదటి వికెట్​గా వెనుదిరిగాడు. తర్వాత 23 పరుగులు చేసి కోహ్లీ ఔటయ్యాడు.

మిగతా బ్యాట్స్​మెన్ ఎవరూ ఎక్కువ సేపు క్రీజులో నిలువలేకపోయారు. డివిలియర్స్ 17, శివమ్ దూబే 24, క్లాసీన్ 3, సుందర్ 1, గురుకీరత్ సింగ్ 27 పరుగులు చేసి వెనుదిరిగారు. చివరి వరుకు నిలిచి 32 పరుగులు చేసిన స్టాయినిస్ జట్టును గెలిపించలేకపోయాడు.

దిల్లీ బౌలర్లలో రబాడా, మిశ్రా తలో రెండు వికెట్లు తీశారు. ఇషాంత్, అక్షర్ పటేల్, రూథర్​ఫర్డ్ తలో వికెట్ పడగొట్టారు.