ముంబయి తడబాటు... చెన్నై లక్ష్యం 150

హైదరాబాద్​ వేదికగా చెన్నైతో జరుగుతున్న ఐపీఎల్​ ఫైనల్​లో ముంబయి ఇండియన్స్​ 149 పరుగులు చేసింది. పొలార్డ్ (41, 25 బంతుల్లో), డికాక్ (29, 17 బంతుల్లో) పరుగులతో ఆకట్టుకున్నారు. చెన్నై బౌలర్లలో దీపక్ చాహర్ 3 వికెట్లు తీశాడు.

చెన్నై సూపర్​ కింగ్స్​తో జరుగుతున్న ఐపీఎల్ ఫైనల్​ మ్యాచ్​లో ముంబయి ఇండియన్స్​ నిర్ణీత 20 ఓవర్లలో 8 వికెట్లు కోల్పోయి 149 పరుగులు చేసింది. హైదరాబాద్​ ఉప్పల్ వేదికగా జరుగుతున్న ఈ మ్యాచ్​లో రోహిత్​ సేన గౌరవప్రదమైన స్కోరు చేసింది. పొలార్డ్(41), డికాక్(29) మినహా మిగతా వారు విఫలమయ్యారు. చెన్నై బౌలర్లలో దీపక్​ చాహర్​ 3 వికెట్లతో ఆకట్టుకోగా.. తాహిర్, శార్దుల్ ఠాకుర్ చెరో రెండు వికెట్లు తమ ఖాతాలో వేసుకున్నారు.

టాస్ గెలిచి బ్యాటింగ్​ తీసుకున్న ముంబయి ఇన్నింగ్స్​ను ధాటిగా ఆరంభించింది. తొలి నాలుగు ఓవర్లలోనే 45 పరుగులు చేసింది డికాక్ - రోహిత్(15) జోడి. అనంతరం ఓవర్​ వ్యవధిలోనే వీరిద్దరూ పెవిలియన్​ చేరారు. తర్వాత ముంబయి ఇన్నింగ్స్​ నెమ్మదించింది. చివర్లో పొలార్డ్ (41), హార్దిక్ పాండ్య(16) చివర్లో కొద్దిసేపు మెరుపులు మెరిపించారు. ఎడాపెడా బౌండరీలు బాదుతూ స్కోరు బోర్డును పరుగులు పెట్టించారు.

17 ఓవర్లకు 120 పరుగులే చేసింది ముంబయి. 18 ఓవర్లో పొలార్డ్, హార్దిక్ చెరో సిక్సర్​ కొట్టి స్కోరు వేగం పెంచారు. 19 ఓవర్లో హార్దిక్​తో పాటు రాహుల్​ చాహర్​నూ వెనక్కిపంపి ముంబయిని దెబ్బకొట్టాడు దీపక్​ చాహర్​. చివరి రెండు ఓవర్లలో 12 పరుగులు మాత్రమే చేసింది ముంబయి.