ది హండ్రెడ్ టోర్నీలో విచిత్రమైన సంఘటన చోటు చేసుకుంది. ఇంగ్లాండ్ క్రికెటర్ అలెక్స్ హేల్స్ ఆయువు పట్టుపై వరుసగా రెండుసార్లు బంతి తగిలింది. ఆ నొప్పికి అతడు విలవిల్లాడాడు. బహుశా వరుస బంతుల్లో ఇలా బంతి తగలడం చరిత్రలోనే తొలిసారి కావొచ్చని అంటున్నారు!
వంద బంతుల ఈ టోర్నీలో ట్రెంట్‌ రాకెట్స్‌కు అలెక్స్ హేల్స్ ప్రాతినిధ్యం వహిస్తున్నాడు. గతరాత్రి ఓవల్‌ ఇన్‌విన్సిబుల్స్‌తో ఆ జట్టు తలపడింది. ట్రెంట్‌ రాకెట్స్‌ తొలుత బ్యాటింగ్‌ చేసింది. హేల్స్ ఎప్పటిలాగే ఓపెనింగ్‌ చేశాడు. ఇన్నింగ్స్‌ 13వ బంతిని టాప్లే వేగంగా విసిరాడు. ఆ బంతిని లెగ్‌ సైడ్‌ ఆడబోతుండగా మిస్సై అతడి హేల్స్ బాక్స్‌ ప్రాంతాన్ని బలంగా తాకింది. ఆ నొప్పికి తాళలేక అతడు విలవిల్లాడాడు. నేలపై అలాగే కూలబడి చేతులు పెట్టుకొని వెల్లకిలా అటు ఇటూ దొర్లాడు. ఫిజియో కూడా అతడికి సాయం చేసేందుకు రావడం గమనార్హం.