IND VS WI 2023 :వెస్టిండీస్‌తో జరిగిన రెండు టెస్టుల సిరీస్ను క్లీన్‌స్వీప్‌ చేయాలనుకున్న టీమ్ఇండియా ఆశ నెరవేరలేదు. వరుణుడు అడ్డింకిగా మారి రెండో టెస్ట్ విజయాన్ని ఎత్తుకెళ్లాడు. రెండో టెస్టులో ఆఖరి రోజు పూర్తిగా వర్షం పడటం వల్ల మ్యాచ్ డ్రాగా ముగిసింది. దీంతో సిరీస్ 1-0తో టీమ్ఇండియా సొంతమైంది.
వాస్తవానికి నాలుగో రోజే వరుణుడు అడ్డుగా నిలిచాడు. దీంతో ఆ రోజు దాదాపు ఒక సెషన్‌ ఆటకు నష్టం వాటిల్లింది. కనీసం చివరి రోజైనా వరుణుడు కరుణించాలని అభిమానులు కోరుకున్నారు. కానీ అదీ జరగలేదు. వర్షం పలుసార్లు పడుతూ ఆగుతూ ఉండటం వల్ల ప్లేయర్స్ మైదానంలోకి రాలేకపోయారు. ఆఖరికి అంపైర్లు ఆటను రద్దు చేస్తున్నట్లు ప్రకటించాల్సి వచ్చింది. ఫలితంగా మ్యాచ్ డ్రాగా ముగిసింది.
నాలుగో రోజు ఆదివారం 365 పరుగుల లక్ష్యంతో బరిలోకి దిగింది వెస్టిండీస్.. చివరికి 76/2తో నిలిచింది. ఇక ఆ జట్టు విజయానికి ఇంకా 289 పరుగులు అవసరమయ్యాయి. కెప్టెన్‌ క్రెయిగ్‌ బ్రాత్‌వైట్‌ (28), అరంగేట్ర బ్యాటర్‌ కిర్క్‌ మెకంజీ (0)లను అశ్విన్‌ (2/33) వరుస ఓవర్లలో పెవిలియన్ చేర్చాడు. త్యాగ్‌నారాయణ్‌ (24),జెర్మైన్‌ బ్లాక్‌వుడ్‌ (20*) నాలుగో రోజు తమ జట్టుకు అండగా నిలిచారు. అయితే అప్పటికే ఈ సిరీస్‌లో భారత బౌలర్ల జోరు చూస్తుంటే.. సోమవారం ఐదో రోజు ఆటలో కనీసం రెండు సెషన్లు పడినా విండీస్‌ను దెబ్బతీసేవారు.