Ind Vs WI 3rd ODI : విండీస్ పర్యటనలో భాగంగా జరుగుతున్న చివరి వన్డేకు సర్వం సిద్ధమైంది. ట్రినిడాడ్లోని బ్రియాన్ లారా స్టేడియం వేదికగా వెస్టిండీస్‌తో మంగళవారం జరగనున్న మూడో వన్డేలో తలపడేందుకు రోహిత్ సేన రెడీగా ఉంది. ఇప్పటికే సిరీస్‌ 1-1తో సమంగా ఉండటం వల్ల ఈ ఆఖరి మ్యాచ్పై సర్వత్ర ఉత్కంఠ నెలకొంది. హోరా హోరీగా జరగనున్న ఈ మ్యాచ్ ఎవరి కైవసం అవుతుందన్న ఆసక్తి క్రికెట్ లవర్స్లో మొదలైంది. దీంతో ఇరు జట్టు ఏ మాత్రం తగ్గేదేలే అంటూ మైదానంలో దిగనున్నాయి. మరోవైపు గత రెండు వన్డేల్లో భారత్ జట్టు తమదైన స్టైల్లో రాణించినప్పటికీ.. మిశ్రమ ఫలితాలను అందుకోగలిగింది.
తొలి వన్డేలో కష్టపడిన రోహిత్ సేన.. ఓ గెలుపును తన ఖాతాలో వేసుకుంది. అయితే ఆ తర్వాత జరిగిన రెండో వన్డేలో మాత్రం ఘోర పరాభవాన్ని మూటగట్టుంది. బ్యాటింగ్లో ప్రయోగాలతో పాటు కెప్టెన్‌ రోహిత్ శర్మ, విరాట్ కోహ్లి టీమ్లో లేకపోవడం వల్ల జట్టుకు ఎదురుదెబ్బ తగిలిందనే చెప్పాలి. ఈ క్రమంలో మంగళవారం జరగనున్న మూడో వన్డేలో ఎటువంటి ప్రయోగాలు చేయకూడదని నిర్ణయించుకున్న మేనేజ్మెంట్.. ఈ మ్యాచ్కు పూర్తి స్దాయి జట్టునే ఆడించాలని అనుకుంటోంది. దీంతో విరాట్ కోహ్లి, రోహిత్ శర్మ తుది పోరులో ప్రత్యక్షమయ్యే అవకాశాలు కనిపిస్తున్నాయి. ఇక రెండో వన్డేను చేజిక్కించుకున్న కరేబియన్ జట్టు.. అదే జోరుతో ఆఖరి పోరులోనూ విజయపథంలో నడవాలని ఆశిస్తోంది.