India Vs South Africa Test Series :సౌతాఫ్రికాతో జరుగుతున్న తొలి టెస్టులో రెండో రోజు టీమ్ఇండియా బౌలర్లు సత్తా చాటలేకపోయారు. దీంతో ప్రత్యర్థులను కట్టడి చేసే విషయంలో విఫలమయ్యారు. దీంతో రెండో రోజు ఆట ముగిసేసరికి 256/5 స్కోరుతో సఫారీలు దూసుకెళ్తున్నారు. అయితే సరైన వెలుతురు లేమి కారణంగా ఆటను 66 ఓవర్ల వద్ద ఆపేశారు.
ఇక సౌతాఫ్రికా ప్లేయర్లలో డీన్ ఎల్గర్‌ (140*) అదరగొట్టాడు. ఇక డేవిడ్ బెడింగ్‌హమ్ (56) కూడా అర్ధ శతకంతో రాణించాడు. తర్వాతి ఆట కోసం ఎల్గర్‌తోపాటు మార్కో జాన్సన్‌ (3*) క్రీజులో ఉన్నాడు. ఇక టోనీ డి జోర్జి (28), మార్‌క్రమ్ (5), కీగన్ పీటర్సన్ (2), వెరినే (4) పరుగులు చేశారు.
మరోవైపు భారత బౌలర్లలో మహ్మద్ సిరాజ్‌, జస్‌ప్రీత్ బుమ్రా తలో రెండు వికెట్లు పడగొట్టారు. అయితే ప్రసిద్ధ్‌ కృష్ణ మాత్రం ఒక వికెట్ తీయగలిగాడు. అంతకుముందు 208/8 ఓవర్‌నైట్‌ స్కోరుతో రెండో రోజు ఆటను ప్రారంభించిన టీమ్ఇండియా నేడు జరిగిన మ్యాచ్లో మరో 37 పరుగులు జోడించి 245 పరుగులకు ఆలౌటైంది. ఇక 70 పరుగులతో క్రీజులోకి వచ్చిన కేఎల్ రాహుల్ (101) శతకం బాది 10వ వికెట్గా పెవిలియన్ బాట పట్టాడు.