India Vs Newzealand World Cup 2023 :ముంబయిలోని వాంఖడే వేదికగా మరికొద్ది సేపట్లో న్యూజిలాండ్తో భారత్ తలపడనుంది. వరుస విజయాలతో దూకుడు మీదున్న రోహిత్ సేన ఇక్కడ కూడా తమ సత్తా చాటాలని భావిస్తోంది. ఈ క్రమంలో ఇక్కడి పిచ్ గురించి పలు అంశాలను క్రికెట్ విశ్లేషకులు చర్చిస్తున్నారు. మ్యాచ్లో తొలుత బ్యాటింగ్ చేసిన జట్టుకు ఇక్కడ అదనపు అధిక్యం లభిస్తుందని.. గతంలో నమోదైన పలు రికార్డులు దీనికి నిదర్శనం అని అంటున్నారు. వాంఖడే వేదికగా.. ఇప్పటి వరకు 27 వన్డేలు జరగ్గా అందులో తొలుత బ్యాటింగ్ చేసిన జట్టు 14 సార్లు విజయ తీరాలకు చేరుకున్నాయి.
అయితే ఇక్కడ టాస్‌ గెలవడం అనే సెంటిమెంట్‌ పెద్దగా ఎఫెక్ట్ చూపించకపోవచ్చట. ఎందుకంటే టాస్‌ ఓడిన జట్లు కూడా 15 సార్లు విజయం సాధించగా.. టాస్‌ నెగ్గిన జట్లు 12 సార్లు మాత్రమే గెలుపొందింది. అయితే కెప్టెన్‌ వ్యూహానికి అనుగుణంగా నిర్ణయం తీసుకోవడానికి టాస్‌ ఉపయోగపడుతుంది. ప్రస్తుత టోర్నీలో ఇక్కడ తొలుత బ్యాటింగ్ చేసిన వారే మూడు సార్లు గెలిచారు. ఇక అఫ్గాన్‌పై ఆస్ట్రేలియా కూడా ఓటిమి అంచు వరకు వెళ్లినా మ్యాక్స్‌వెల్‌ మెరుపు ఇన్నింగ్స్‌తో విజయతీరాలకు చేరింది.