రుతురాజ్​ సెంచరీ వృథా- మూడో టీ20లో ఆసీస్​ గెలుపు

India Vs Australia 3rd T20 2023 : టీమ్ఇండియాతో జరిగిన మూడో టీ20లో ఆస్ట్రేలియా 5 వికెట్ల తేడాతో విజయం సాధించింది. గ్లెన్ మ్యాక్స్​వెల్ (104*) పరుగులతో దూకుడుగా ఆడి జట్టును విజయ తీరాలకు చేర్చాడు. టీమ్ఇండియా బ్యాటర్ రుతురాజ్ సెంచరీ వృథా అయింది.

India Vs Australia 3rd T20 2023 : ఐదు మ్యాచ్​ల టీ20 సరీస్​లో భాగంగా మంగళవారం జరిగిన మూడో టీ20లో టీమ్ఇండియాపై ఆస్ట్రేలియాపై 5 వికెట్ల తేడాతో ఘన విజయం సాధించింది. మొదట బ్యాటింగ్​కు దిగిన భారత్​ 3 వికెట్ల నష్టానికి 222 పరుగులు చేసింది. ఆసీస్​కు 223 పరుగుల లక్ష్యాన్ని నిర్దేశించింది. భారీ టార్గెట్​తో బరిలోకి దిగిన ఆస్ట్రేలియా మొదట తడబడింది. ఓపెనర్ ట్రావిస్ హెడ్​ (35) ఫర్వాలేదనిపించినా.. అరోన్ హార్డీ (16) నిరాశ పరిచాడు. వన్​డౌన్ దిగిన జోష్ ఇంగ్లిస్​ (10) కూడా పేలవ ప్రదర్శన చేశాడు. ఈ క్రమంలో వచ్చిన గ్లెన్​ మ్యాక్స్​వెల్​ (104*) విశ్వరూపం చూపించాడు. ఫోర్లు, సిక్సర్లు కొడుతూ స్కోర్​ బోర్డును పరుగులు పెట్టించాడు. అయిదే అతడికి మార్కస్​ స్టాయినిస్​ (17) మద్దతుగా నిలిచేందుకు ప్రయత్నించాడు. కానీ అక్షర్ పటేల్​ వేసిన 13వ ఓవర్​ చివరి బంతికి సూర్యకుమార్​కు క్యాచ్​ ఇచ్చి పెవిలియన్ చేరాడు. ఆ తర్వాత వచ్చిన టిమ్​ డేవిడ్​ (0) డకౌట్​ అయ్యాడు. అనంతరం క్రీజులోకి దిగిన కెప్టెన్ మాథ్యూ వేడ్​ (28*) మ్యాక్స్​వెల్​తో కలిసి చివరి వరకు పోరాడి జట్టును విజయ తీరాలకు చేర్చారు. ఇక భారత బౌలర్లలో రవి బిష్ణోయ్​ రెండు వికెట్లు పడగొట్టాడు. అర్ష్​దీప్​ సింగ్, ఆవేశ్ ఖాన్, అక్షర్ పటేల్ తలో వికెట్ తీశారు.

కొంపముంచిన చివరి ఓవర్​..
ప్రసిద్ధ్ కృష్ణ వేసిన 20వ ఓవర్​ టీమ్ఇండియా కొంపముంచింది. ఓవర్​లో రెండో బంతి సింగిల్ మినహా.. వరుసగా ఫోర్లు, సిక్సర్లు బాదారు ఆస్ట్రేలియా బ్యాటర్లు. (4, 1, 6, 4, 4, 4 )

రుతురాజ్​ గైక్వాడ్​ సెంచరీ వృథా..
అంతకుముందు టాస్​ బౌలింగ్​కు దిగిన టీమ్ఇండియా నిర్ణీత 20 ఓవర్లలో 3 వికెట్ల నష్టానికి 222 పరుగుల భారీ స్కోరు సాధించింది. స్టార్ బ్యాటర్ రుతురాజ్ గైక్వాడ్ (123*; 57 బంతుల్లో 13x4, 7x6) సెంచరీతో కదంతొక్కాడు. యశస్వి జైస్వాల్ (6), ఇషాన్‌ కిషన్ (0) నిరాశపర్చారు. సూర్యకుమార్‌ యాదవ్‌ (39; 29 బంతుల్లో 5x4, 2x6), తిలక్ వర్మ (31*; 24 బంతుల్లో 4x4) దూకుడుగా ఆడారు. ఇక ఆసీస్‌ బౌలర్లలో కేన్ రిచర్డ్ సన్‌, బెరెన్‌డార్ఫ్‌, ఆరోన్ హార్డీ తలో వికెట్ పడగొట్టారు. కాగా ఈ టీ20 సిరీస్​లో ఇప్పటివరకు జరిగిన మూడు మ్యాచ్​లో రెండింట్లో విజయం సాధించింది 2-1 తేడాదో టీమ్​ఇండియా అధిక్యంలో నిలిచింది.