IND Vs WI Second ODI: అదే వేదిక.. అదే ప్రత్యర్థి.. మూడు రోజుల వ్యవధిలో వెస్టిండీస్‌తో రెండో వన్డే ఆడేందుకు టీమ్ఇండియా సిద్ధమైంది. శుక్రవారం తొలి మ్యాచ్‌లో ప్రత్యర్థి భయపెట్టినా.. కీలక సమయంలో ఒత్తిడి అధిగమించి మూడు పరుగుల తేడాతో భారత్‌ గెలిచింది. ఆదివారం రెండో మ్యాచ్‌లోనూ నెగ్గి మరో పోరు మిగిలి ఉండగానే మూడు వన్డేల సిరీస్ సొంతం చేసుకోవాలనే పట్టుదలతో ఉంది. ఈ మ్యాచ్‌లోనూ పరాజయం పాలైతే సిరీస్ కోల్పోయే ప్రమాదం ఉంది కాబట్టి విండీస్‌ తెగించి ఆడొచ్చు.
వీళ్లు రాణిస్తే..
కెప్టెన్‌ ధావన్‌, శుభ్‌మన్‌ గిల్‌, శ్రేయస్‌.. ఈ టాప్‌ఆర్డర్‌ తొలి వన్డేలో భారత్‌ భారీస్కోరుకు బాటలు వేసింది. కొంతకాలంగా ఫామ్‌ లేమితో సతమతమవుతున్న ధావన్‌, శ్రేయస్‌ తిరిగి పరుగులు చేయడం ఊరట కలిగించే విషయం. రుతురాజ్‌, ఇషాన్‌ను దాటి ఓపెనర్‌గా వచ్చిన గిల్‌ రాణించడం శుభ పరిణామం. రెండో వన్డేలోనూ ఈ త్రయం ఇదే జోరు కొనసాగించాలని జట్టు ఆశిస్తోంది. ఇక గత మ్యాచ్‌లో విఫలమైన మిడిలార్డర్‌ సత్తాచాటాల్సిన అవసరం ఉంది. ఆ మ్యాచ్‌లో 350కి పైగా పరుగులు చేసేలా కనిపించిన జట్టు మిడిలార్డర్‌ వైఫల్యంతో తక్కువ స్కోరుకే సరిపెట్టుకుంది. దీపక్‌ హుడా, సూర్య కుమార్‌ కాస్త సమయం క్రీజులో గడిపితే సరిపోతుంది. ఈ అవకాశాన్ని సద్వినియోగం చేసుకోవడం శాంసన్‌కు అత్యావశ్యకం. బౌలింగ్‌లో సిరాజ్‌, శార్దూల్‌, చాహల్‌తో పాటు మిగతా బౌలర్లూ వికెట్లు తీయాలి. ప్రమాదకర బ్యాటింగ్‌ లైనప్‌తో కూడిన విండీస్‌ను ఎంత త్వరగా కట్టడి చేస్తే అంత మంచింది.
గెలుపు కోసం..
తొలి వన్డేలో గెలిచినంత పని చేసిన వెస్టిండీస్‌.. ఈ సారి విజయ తీరాలకు చేరుకోవాలనే పట్టుదలతో ఉంది. వన్డేల్లో గత ఏడు మ్యాచ్‌ల్లో ఓడిన ఆ జట్టు వరుస పరాజయాలకు చెక్‌ పెట్టాలని చూస్తోంది. గత మ్యాచ్‌లో బంతి పాతబడ్డాక ఆ జట్టు బౌలర్లు గొప్పగా రాణించి టీమ్‌ఇండియాకు కళ్లెం వేశారు. ఇక బ్యాటర్లు విజయం కోసం చివరి వరకూ పోరాడారు. ఈ మ్యాచ్‌లోనూ అదే పోరాట పటిమ ప్రదర్శించాలని పూరన్‌ సేన భావిస్తోంది. వన్డే ప్రపంచకప్‌ సూపర్‌ లీగ్‌లో ఈ సిరీస్ భాగం కాదు కాబట్టి ఎలాంటి ఒత్తిడి లేకుండా విండీస్‌ ఆడే అవకాశం ఉంది. గత మ్యాచ్‌లో బౌలింగ్‌లో అల్జారి జోసెఫ్‌, మోటీ ఆకట్టుకున్నారు. బ్యాటింగ్‌లో మేయర్స్‌, బ్రూక్స్‌, కింగ్‌ రాణించారు. వీళ్లతో పాటు కెప్టెన్‌ పూరన్‌, హోప్‌ క్రీజులో నిలబడాలని జట్టు కోరుకుంటోంది. కానీ భారత బౌలర్లు వీళ్లకు ఆ అవకాశం ఇవ్వకూడదు.