IND Vs WI Kohli : వెస్టిండీస్తో టెస్టు సిరీస్ నేపథ్యంలో టీమ్ఇండియా స్టార్ విరాట్ కోహ్లీ అత్యంత అరుదైన రికార్డు ముంగిట నిలిచాడు. జూలై 12న ఆరంభం కానున్న తొలి టెస్టులో విండీస్‌ తుది జట్టు కూర్పుపై కోహ్లీ ఈ ఘనత సాధిస్తాడా లేదా అన్న విషయం ఆధారపడి ఉంది.
Sachin Test Records : టీమ్ఇండియా దిగ్గజం సచిన్ పేరిట ఉన్న ఎన్నో రికార్డులు బద్దలు కొట్టిన విరాట్.. విండీస్‌ తొలి టెస్టు సందర్భంగా మాస్టర్ మరో అరుదైన రికార్డును సమం చేసే అవకాశం ఉంది. 1992లో ఆస్ట్రేలియా పర్యటనలో సచిన్.. జెఫ్‌ మార్ష్‌ భాగంగా ఉన్న జట్టుతో తలపడ్డాడు. ఆ తర్వాత 2011/12 టూర్‌లో జెఫ్‌ కుమారుడు షాన్‌ మార్ష్‌తో ఉన్న టీమ్‌తోనూ పోటీపడ్డాడు. జెఫ్‌ కెరీర్‌లో 1992 నాటి మ్యాచ్‌ చివరిది కాగా.. సచిన్‌కు ఆస్ట్రేలియా గడ్డ మీద తొలి మ్యాచ్‌. అదే విధంగా 2011 నాటి మ్యాచ్‌కు షాన్‌ మార్ష్‌కు టీమ్ఇండియాతో మొదటిది కాగా.. సచిన్‌కు విదేశీ గడ్డ మీద చివరి టెస్టు కావడం విశేషం.
Virat Kohli Test Records : ఇప్పుడు విరాట్ కోహ్లీ ప్రస్తుత సిరీస్‌తో సచిన్ సరసన నిలిచే అవకాశం ఉంది. అదెలాగంటే... 2011 వెస్టిండీస్ పర్యటన సందర్భంగా... కోహ్లీ.. శివ్‌నరైన్‌ చందర్‌పాల్‌ భాగంగా ఉన్న జట్టుతో ఆడాడు. ఇక ఇప్పుడు శివ్‌నరైన్‌ తనయుడు తగ్‌నరైన్‌ చందర్‌పాల్‌ విండీస్‌ టెస్టు జట్టులో కీలక సభ్యుడిగా ఎదుగుతున్నాడు. జులై 12న మొదలుకానున్న టీమ్ఇండియాతో తొలి టెస్టుకు ఎంపికయ్యాడు. ఈ నేపథ్యంలో తుది జట్టులో అతడు చోటు దక్కించుకుంటే.. విదేశీ గడ్డ మీద ప్రత్యర్థి జట్ల తండ్రీ- కొడుకులతో ఆడిన రెండో బ్యాటర్‌గా కోహ్లీ చరిత్రకెక్కుతాడు. అంతకంటే ముందు ఈ ఘనత సాధించిన సచిన్ సరసన నిలుస్తాడు.