IND vs SL World Cup 2023 :2023 వరల్డ్కప్లో భాగంగా శ్రీలంకతో జరుగుతున్న మ్యాచ్లో టీమ్ఇండియా స్టార్ బ్యాటర్లు విరాట్ కోహ్లీ (88 పరుగులు), శుభ్మన్ గిల్ (92 పరుగులు) అద్భుతంగా రాణించారు. ఈ ఇద్దరూ లంక బౌలర్లను సమర్థంగా ఎదుర్కొంటూ.. సెంచరీకి దగ్గరగా వెళ్లారు. కానీ, అనూహ్యంగా వీరిద్దరినీ బౌలర్ మధుషంక.. తన వరుస ఓవర్లలో పెవిలియన్ చేర్చాడు. వీరిద్దరూ స్కోర్ బోర్డును పరుగులు పెట్టిస్తూ.. రెండో వికెట్కు 189 పరుగులు జోడించారు. ఈ క్రమంలోనే విరాట్.. మాస్టర్ బ్లాస్టర్ తెందూల్కర్ రికార్డును బ్రేక్ చేశాడు. అదేంటంటే?
విరాట్ ఈ ఏడాది వన్డేల్లో 1000 పరుగులు పూర్తి చేసుకున్నాడు. ఆతడు 34 పరుగుల వ్యక్తిగత స్కోర్ వద్ద ఈ ఫీట్ అందుకున్నాడు. అయితే ఓ క్యాలెండర్ ఇయర్లో 1000+ పరుగులు సాధించడం, విరాట్కు ఇది ఎనిమిదోసారి. ఇప్పటివరకు సచిన్ తెందూల్కర్, విరాట్.. సమానంగా 7 సార్లు ఈ ఫీట్ అందుకున్నారు. తాజా మ్యాచ్తో విరాట్.. ఈ రికార్డును బ్రేక్ చేశాడు.
విరాట్ మూడోసారి.. ప్రస్తుత మెగాటోర్నీలో విరాట్ అత్యుత్తమ ఫామ్తో దూసుకుపోతున్నాడు. అయితే ఇప్పటివరకు 7 మ్యాచ్లు ఆడిన విరాట్.. 15 పరుగులలోపే మూడుసార్లు సెంచరీ సాధించే ఛాన్స్ మిస్ చేసుకున్నాడు. అతడు ఈ టోర్నీలో.. ఆస్ట్రేలియాపై 88, న్యూజిలాండ్పై 95, తాజాగా శ్రీలంకపై 88 పరుగులు చేసి ఔటయ్యాడు. ఇక 7 మ్యాచ్ల్లో విరాట్.. 88.40 సగటుతో 442 పరుగులు సాధించాడు. ఇందులో ఓ సెంచరీ, 4 హాఫ్ సెంచరీలు ఉన్నాయి. అత్యధిక పరుగుల చేసిన లిస్ట్లో విరాట్.. రెండో స్థానంలో కొనసాగుతున్నాడు. సౌతాఫ్రికా బ్యాటర్ క్వింటన్ డికాక్ 545 పరుగులతో టాప్లో ఉన్నాడు. కాగా, టీమ్ఇండియా కెప్టెన్ రోహిత్ శర్మ 402 పరుగులతో టాప్-5లో కొనసాగుతున్నాడు.