IND VS SL: సూర్యకుమార్​ మెరుపు సెంచరీ.. గ్రౌండ్​లో సిక్సర్ల సునామీ..​ లంక లక్ష్యం ఎంతంటే?

లంకతో జరుగుతున్న మూడో టీ20లో టీమ్​ఇండియా స్టార్ బ్యాటర్​ సూర్యకుమార్​ యాదవ్​ అదరగొట్టేశాడు. సెంచరీతో మెరిశాడు. దీంతో భారత జట్టు.. ప్రత్యర్థి టీమ్​కు 229 పరుగుల భారీ లక్ష్యాన్ని నిర్దేశించింది.

లంకతో జరుగుతున్న మూడో టీ20లో స్టార్ బ్యాటర్​ సూర్యకుమార్​ యాదవ్​ మరోసారి విధ్వంసాన్ని సృష్టించాడు. బ్యాట్​తో చెలరేగిపోయాడు. క్రీజులోకి వచ్చినప్పటి నుంచి ఫోర్లు, సిక్సర్లతో ప్రత్యర్థి జట్టుపై విరుచుకుపడుతూ స్కోరు బోర్డును పరుగులు పెట్టించాడు. మైదానం నలుమూలల షాట్లు ఆడుతూ అభిమానులను అలరించాడు. మొత్తంగా 51 బంతుల్లో 112 రన్స్​ చేసి సెంచరీతో మెరిశాడు. దీంతో అతడు టీ20ల్లో మూడో శ‌త‌కం న‌మోదు చేశాడు. టీమ్​ఇండియా త‌ర‌ఫున వేగ‌వంత‌మైన టీ20 సెంచ‌రీ చేసిన రెండో ఆట‌గాడిగా నిలిచాడు. అంతకుముందు రోహిత్ శ‌ర్మ మొద‌టి స్థానంలో ఉన్నాడు. 2017 శ్రీ‌లంకపై రోహిత్ 35 బంతుల్లోనే శ‌త‌కం బాదాడు.

ఇకపోతే ఈ ఇన్నింగ్స్​లో శుభ్‌మ‌న్ గిల్ (48), రాహుల్ త్రిపాఠి(3)5 రాణించారు. దీప‌క్ హుడా (4), ఇషాన్ కిష‌న్ (1) విఫ‌లం అయ్యారు. మొత్తంగా టాస్ గెలిచి బ్యాటింగ్ ఎంచుకున్న భారత జట్టు నిర్ణీత 20 ఓవర్లలో 5 వికెట్లు కోల్పోయి 228 పరుగులు చేసింది. లంక బౌలర్లలో మదుశంక(2), రజితా, కరుణరత్నె, హసరంగ తలో వికెట్ తీశారు.

ఇదీ చూడండి:బీసీసీఐ కొత్త సెలక్షన్ కమిటీ ప్రకటన.. ఛైర్మన్ ఎవరంటే?