IND Vs SA 2nd Test Records : దక్షిణాఫ్రికాతో జరిగిన రెండో టెస్ట్‌లో టీమ్ఇండియా ఘన విజయం సాధించి సిరీస్‌ను 1-1తో సమం చేసింది. తొలి టెస్ట్‌లో ఇన్నింగ్స్‌ తేడాతో పరాజయం పాలైన భారత్ జట్టు, రెండో టెస్టులో ఘన విజయం సాధించి సఫారీలపై ప్రతీకారం తీర్చుకుంది. రోజున్నరలోనే ముగిసిన ఈ టెస్ట్‌లో సఫారీ బ్యాటర్లలకు భారత పేసర్లు చుక్కలు చూపించారు.
టీమ్ఇండియాకు ఇదే తొలి విజయం!
తొలి ఇన్నింగ్స్‌లో ఆరు వికెట్లతో సిరాజ్‌ నిప్పులు చెరగ్గా, రెండో ఇన్నింగ్స్‌లో ఆరు వికెట్లతో బుమ్రా ప్రొటీస్‌ పతనాన్ని శాసించాడు. 107 ఓవర్లలోనే ముగిసిన ఈ మ్యాచ్‌లో 33 వికెట్లు నేలకూలగా అన్ని వికెట్లు సీమర్లకే పడ్డాయి. సౌతాఫ్రికా నిర్దేశించిన 79 పరుగుల స్వల్ప లక్ష్యాన్ని టీమ్ఇండియా మూడు వికెట్లు కోల్పోయి 12 ఓవర్లలోనే ఛేదించింది. కేప్‌టౌన్‌ మైదానంలో టీమ్ఇండియాకు ఇదే తొలి విజయం.
టెస్ట్ క్రికెట్‌ చరిత్రలో!
1935లో ఆస్ట్రేలియా- దక్షిణాఫ్రికా మధ్య జరిగిన మ్యాచ్ 109 ఓవర్లలో ముగియగా, ఈ మ్యాచ్ కేవలం 107 ఓవర్లలోనే ముగిసింది. టెస్ట్ క్రికెట్‌ చరిత్రలో అతి తక్కువ ఓవర్లలో ముగిసిన మ్యాచ్గా ఇది రికార్డు సృష్టించింది. కేవలం ఒకటిన్నర రోజుల్లోనే (నాలుగున్నర సెషన్లు) ముగిసిన ఈ మ్యాచ్ టెస్ట్ క్రికెట్‌ చరిత్రలో బంతుల పరంగా అత్యంత వేగంగా ముగిసిన మ్యాచ్గా రికార్డు క్రియేట్ చేసింది.
1932లో ఆస్ట్రేలియా-సౌతాఫ్రికా మధ్య మెల్‌బోర్న్‌లో జరిగిన మ్యాచ్ ఈ మ్యాచ్‌కు ముందు వరకు టెస్ట్‌ల్లో బంతుల పరంగా అత్యంత వేగంగా ముగిసిన మ్యాచ్గా ఉండింది. ఈ జాబితాలో వెస్టిండీస్‌-ఇంగ్లాండ్‌ మధ్య 1935లో జరిగిన మ్యాచ్ మూడో స్థానంలో (672 బంతుల్లో) ఉండగా ఇంగ్లండ్‌-ఆస్ట్రేలియా మధ్య 1888లో జరిగిన మ్యాచ్ నాలుగో స్థానంలో (788), ఇంగ్లండ్‌- ఆస్ట్రేలియా మధ్య 1888లో జరిగిన మ్యాచ్(లార్డ్స్‌) ఐదో స్థానంలో (792) ఉన్నాయి.
ధోనీ తర్వాత రోహితే!
మాజీ కెప్టెన్ ధోనీ తర్వాత సఫారీ గడ్డపై సిరీస్ కోల్పోని రెండో కెప్టెన్‌గా రోహిత్ శర్మ ఘనత సాధించాడు. 2010-11 సీజన్‌లో మిస్టర్ కూల్ కెప్టెన్సీలో టెస్టు సిరీస్‌ను 1-1తో ముగించింది టీమ్ఇండియా. ఆ జట్టుతో జరిగిన మొత్తం ఎనిమిది సిరీసుల్లో ఏడింట్లో(1992-93, 1996-97, 2001-02, 2006-07, 2013, 2018, 2021-22) భారత్ ఓటమిపాలైంది. ఇప్పుడు సౌతాఫ్రికాతో సిరీస్ సమం చేసింది రోహిత్ సేన.
తొలి ఆసియా జట్టుగా చరిత్ర!
ఈ మ్యాచ్‌లో ప్లేయర్‌ ఆఫ్‌ ది మ్యాచ్గా సిరాజ్‌ నిలవగా, ప్లేయర్‌ ఆఫ్‌ ది సిరీస్‌గా కెరీర్‌లో చివరి టెస్ట్ ఆడిన డీన్‌ ఎల్గర్‌తోపాటు బుమ్రా నిలిచాడు. దక్షిణాఫ్రికా పర్యటనను టీమ్ఇండియా సంతృప్తికరంగా ముగించింది. వన్డే సిరీస్‌ను 2-1తో కైవసం చేసుకున్న భారత్, టీ20 సిరీస్, టెస్ట్ సిరీస్‌లను డ్రా చేసుకుంది. కేప్టౌన్లో టెస్టు మ్యాచ్ గెలిచిన తొలి ఆసియా జట్టుగా కూడా చరిత్ర సృష్టించింది.
