IND vs SA 2021: భారత జట్టు దక్షిణాఫ్రికా పర్యటన నేపథ్యంలో టీమ్లో గందరగోళం నెలకొంది. ప్రాక్టీస్ సెషన్లో గాయాలైన కారణంగా టెస్టు సిరీస్కు హాజరుకాలేనని వైస్ కెప్టెన్ రోహిత్ శర్మ బీసీసీఐకి తెలిపాడు. మరోవైపు వ్యక్తిగత కారణాల వల్ల వన్డే సిరీస్కు విరాట్ కోహ్లీ దూరంకానున్నట్లు తెలుస్తోంది. ఈ నేపథ్యంలో విరాట్-రోహిత్ మధ్య బేధాభిప్రాయాలున్నాయంటూ చర్చలు జరుగుతున్నాయి.
ఇటీవలే వన్డే జట్టుకు సారథిగా విరాట్ కోహ్లీని తొలగిస్తూ బీసీసీఐ కీలక నిర్ణయం తీసుకుంది. కెప్టెన్ బాధ్యతలను రోహిత్కు అప్పగించింది. అయితే.. దీనిపై విరాట్నుంచి ఎలాంటి స్పందన రాలేదు. అనంతరం తలెత్తిన తాజా పరిస్థితుల నేపథ్యంలో.. టీమ్ఇండియా జట్టులో ఏం జరుగుతుందో అర్థంకాక అభిమానులు సతమతమవుతున్నారు.
దక్షిణాఫ్రికా పర్యటనలో భాగంగా.. టెస్టుల్లో విరాట్ సారథ్యంలో రోహిత్, వన్డేల్లో రోహిత్ సారథ్యంలో విరాట్ ఆడాల్సి ఉంటుంది. ఇది ఇష్టంలేకే వారు సిరీస్ నుంచి తప్పుకుంటున్నారని అభిమానులు తీవ్ర ఆగ్రహం వ్యక్తం చేస్తున్నారు. సామాజిక మాధ్యమాల్లో బీసీసీఐపై, కోహ్లీపై మండిపడుతున్నారు.
ఈ పరిణామాన్ని 'అవార్డు విన్నింగ్ స్క్రిప్ట్' అని ఓ యూజర్ అభివర్ణించాడు. బీసీసీఐపై తన ఆవేదన వ్యక్తపరిచాడు. 'మా పెళ్లికి మీరు రాలేదు కాబట్టి, మీ పెళ్లికి మేం రాం అన్నట్లుగా ఉంది పరిస్థితి' అంటూ మరో వ్యక్తి ట్వీట్ చేశాడు.