Ind vs Pak Asia Cup 2023 : డోంట్​ వర్రీ ఫ్యాన్స్​.. టోర్నీలో మరో ఇండో-పాక్ మ్యాచ్​.. డేట్ ఫిక్స్​!

Ind vs Pak Asia Cup 2023 : ఎన్నో రోజుల నుంచి ఉత్కంఠగా ఎదురుచూసిన ఆసియా కప్​ ఇండోపాక్ మ్యాచ్ వర్షార్పణం అయ్యింది. దీంతో క్రికెట్ ఫ్యాన్స్ తీవ్ర నిరాశ చెందారు. అయతే అన్నీ అనుకున్నట్లు జరిగితే.. ఇదే టోర్నీలో ఇంకో రెండు సార్లు భారత్ పాక్ మ్యాచ్ జరగవచ్చు. అది ఎలాగంటే..

Ind vs Pak Asia Cup 2023 :2023 ఆసియా కప్​లో ఫ్యాన్స్​ అందరూ ఎప్పుడెప్పుడా అని ఎదురుచూసిన భారత్-పాకిస్థాన్మ్యాచ్​ను.. వరుణుడు తన ఖాతాలో వేసుకున్నాడు. దీంతో యావత్ క్రికెట్ ప్రపంచం నిరాశకు లోనైంది. అయితే ముందు నుంచి అంటున్నట్లుగానే ఈ మినీ టోర్నమెంట్​లో దాయాదుల మధ్య మరో సమరం ఉండే ఛాన్స్ ఉంది. మరి అది ఎలా సాధ్యం అంటే?

గత రెండు సీజన్లలో టీ20 ఫార్మాట్​లో జరిగిన ఆసియా కప్​ను.. ఈసారి వన్డే ఫార్మాట్​లో నిర్వహిస్తున్నారు. ఆరు జట్లను రెండు గ్రూపులుగా విభజించి లీగ్ మ్యాచ్​లు జరుపుతున్నారు. ఇందులో రెండు గ్రూపుల్లో నుంచి చివరి ప్లేస్​లో ఉన్న టీమ్స్​ నిష్క్రమిస్తాయి. ఈ క్రమంలో భారత్, తదుపరి మ్యాచ్ నేపాల్​తో ఆడనుంది. ఇరుజట్ల మధ్య పోరు సోమవారం ఉండనుంది. ఇక ఈ మ్యాచ్​కు కూడా పల్లెకెలె మైదానం వేదిక కానుంది. ఈ పోరులో భారత్ గెలుపు దాదాపు ఖాయమేనని ఫ్యాన్స్ అంటున్నారు. ఈ మ్యాచ్​లో భారత్ గెలిస్తే.. మూడు పాయింట్లతో గ్రూప్​-ఏ లో పాక్​ తర్వాత రెండో స్థానంలో నిలుస్తుంది.

దీంతో షెడ్యూల్ ప్రకారం.. సెప్టెంబర్ 10న మరోసారి ఇండోపాక్ మ్యాచ్​ను చూడవచ్చు. కానీ నేపాల్​తో గెలుపు అనంతరమే ఈ మ్యాచ్​ అధికారికంగా ఫిక్స్ అవుతుంది. ఇక సూపర్ 4 దశలో రెండు జట్లు అదరగొడితే.. ఫైనల్స్​లో ముచ్చటగా మూడోసారి కూడా భారత్ పాక్ మ్యాచ్ జరిగే అవకాశం ఉంటుంది. ​

ఇక పల్లెకెలె వేదికగా శనివారం జరిగిన భారత్ పాకిస్థాన్ మ్యాచ్​కు వర్షం పలుమార్లు అంతరాయం కలిగించింది. తొలి ఇన్నింగ్స్ పూర్తైన తర్వాత వాన జోరందుకుంది. దీంతో అంపైర్లు మ్యాచ్​ను రద్దు చేశారు. అంతకుముందు టాస్ గెలిచి బ్యాటింగ్ ఎంచుకున్న భారత్ 48.5 ఓవర్లలో 266 పరుగులు చేసింది. ఇషాన్ కిషన్ (82), హార్దిక్ పాండ్య (87) మినహా ఎవరూ చెప్పుకోదగ్గ ప్రదర్శన చేయలేదు. పాక్ బౌలర్లలో షహీన్ అఫ్రిదీ 4, హారిస్ రౌఫ్ 3, నజీమ్ షా 3 వికెట్లు పడగొట్టారు. అయితే ఈ మ్యాచ్​లో వికెట్లన్నీ పేసర్ల ఖాతాలోనే పడటం విశేషం.