Ind vs Pak Asia Cup 2023 : ఆదుకున్న ఇషాన్, హార్దిక్.. ఇక భారమంతా బౌలర్లమీదే

Ind vs Pak Asia Cup 2023 : ఆసియా కప్​లో భాగంగా జరుగుతున్నఇండోపాక్ మ్యాచ్​లో టీమ్ఇండియా ఇన్నింగ్స్ ముగిసింది. 48.5 ఓవర్లలో 266 పరుగులు చేసి భారత్ ఆలౌటైంది.

Ind vs Pak Asia Cup 2023 :ప్రతిష్ఠాత్మకమైన ఆసియా కప్​లో భాగంగా శనివారం భారత్ పాకిస్థాన్ పోరులో టీమ్ఇండియా ఇన్నింగ్స్ ముగిసింది. భారత్ 48.5 ఓవర్లలో 266 పరుగులు చేసి ఆలౌటైంది. హార్డ్ హిట్టర్ హార్దిక్ పాండ్య (87 పరుగులు: 89 బంతుల్లో; 7x4, 1x6), యువ బ్యాటర్ ఇషాన్ కిషన్ (82 పరుగులు: 81 బంతుల్లో; 9x4, 2x6) హాఫ్ సెంచరీలతో కదం తొక్కారు. ఇక పాకిస్థాన్ బౌలర్లలో షహీన్ అఫ్రిదీ 4, హారిస్ రౌఫ్ 3, నసీమ్ షా 3 వికెట్లు పడగొట్టారు.

టాస్ గెలిచి బ్యాటింగ్ ఎంచుకున్న భారత్​కు ఘనమైన ఆరంభమేమీ దక్కలేదు. పాక్ బౌలర్ షహీన్ అఫ్రిది నిప్పులు చెరిగాడు. పదునైన పేస్​ బౌలింగ్​తో కెప్టెన్ రోహిత్​(11), స్టార్ ప్లేయర్ విరాట్ కోహ్లీ(4) ని క్లీన్​బౌల్డ్ చేసి భారత్​ను కోలుకోలేని దెబ్బకొట్టాడు. ఇక సుదీర్ఘ విరామం తర్వాత.. జట్టులోకి ఎంట్రీ ఇచ్చిన శ్రేయస్ అయ్యర్ వచ్చీ రాగానే రెండు ఫోర్లు కొట్టి ఊపుమీద కనిపించాడు. కానీ అయ్యర్​ (14)ను హారిస్ రౌఫ్ వెనక్కిపంపాడు. కొద్దిసేపటికే శుభ్​మన్ గిల్ (10) కూడా పెవిలియన్ చేరాడు. దీంతో భారత్ 14.1 ఓవర్లకు 66-4తో కష్టాల్లో పడింది.

ఆదుకున్న ఆ ఇద్దరు..
66-4తో ఉన్న భారత్​ను ఇషాన్-హార్దిక్ ఆదుకున్నారు. స్ట్రైక్​ రోటేట్​ చేస్తూ.. క్రీజులో పాతుకుపోయారు. ఇక అనవసర షాట్లకు పోకుండా.. పాక్ బౌలర్లకు ఏ మాత్రం ఛాన్స్ ఇవ్వలేదు. వీలు చిక్కినప్పుడల్లా.. బౌండరీలు బాదుతూ స్కోర్ బోర్డును ముందుకు కదిలించారు. ఈ క్రమంలో ఇషాన్ 54 బంతుల్లో.. కెరీర్​లో ఏడో అర్ధ శతకం నమోదు చేశాడు. తర్వాత హార్దిక్ కూడా ఫిఫ్టీ పూర్తి చేశాడు.

ఇక ఇన్నిగ్స్ సాఫీగా సాగుతుందనుకున్న సమయంలో ఇషాన్​ను హారిస్ పెవిలియన్ చేర్చాడు. దీంతో 138 పరుగుల భాగస్వామ్యానికి తెరపడింది. ఆ తర్వాత హార్దిక్.. సెంచరీకి చేరువవుతున్న తరుణంలో షహీన్ మళ్లీ పాక్​క బ్రేక్ ఇచ్చాడు. స్లో డెలివరీతో హార్దిక్​ను బోల్తా కొట్టించాడు. ఆ తర్వాత జడేజా(14)ను కూడా షహీన్ అదే ఓవర్లో ఔట్ చేశాడు. శార్దూల్ ఠాకూర్ (3) నిరాశపరిచాడు. చివర్లో బుమ్రా పోరటంతో భారత్ 266 పరుగులకు చేరుకుంది.