ICC Test Rankings : అంతర్జాతీయ క్రికెట్ కౌన్సిల్ (ఐసీసీ) తాజాగా ప్రకటించిన టెస్టు ర్యాంకింగ్స్లో.. టీమ్ఇండియా యువ సంచలనం యశస్వి జైస్వాల్ అరంగేట్ర మ్యాచ్తోనే స్థానం సంపాదించాడు. తాజా ర్యాంకింగ్స్లో జైస్వాల్ 73 ప్లేస్లో కొనసాగుతున్నాడు. అయితే టాప్ 10 బ్యాటర్ల లిస్ట్లో.. టీమ్ఇండియా నుంచి భారత జట్టు కెప్టెన్ రోహిత్ శర్మ ఒక్కడే చోటు దక్కించుకున్నాడు. రోహిత్751 పాయింట్లతో 10వ స్థానంలో నిలిచాడు. టీమ్ఇండియా వికెట్ కీపర్ రిషభ్ పంత్ (750 పాయింట్లు) 11వ స్థానం, స్టార్ బ్యాటర్విరాట్ కోహ్లీ (711 పాయింట్లు) 14వ స్థానంలో కొనసాగుతున్నాడు. గత కొద్ది కాలంగా పేలవ ప్రదర్శన చేస్తున్న టీమ్ఇండియా నయావాల్ ఛెతేశ్వర్ పుజారా మూడు స్థానాలు కోల్పోయి (612 పాయింట్లు) 29వ స్థానంలో నిలిచాడు.
- న్యూజిలాండ్ ప్లేయర్ కేన్ విలియమ్సన్ 883 పాయింట్లతో టాప్లో నిలిచాడు.
- ఆస్ట్రేలియా ఆటగాడు ట్రావిస్ హెడ్ 874 పాయింట్లలో రెండో స్థానాన్ని దక్కించుకున్నాడు.
- పాకిస్థాన్ బ్యాటర్ బాబర్ అజామ్ 862 పాయింట్లతో మూడో స్థానంలో నిలిచాడు.
- ఆస్ట్రేలియా స్టార్ స్టీవ్ స్మిత్ 855 పాయింట్లతో నాలుగో స్థానంలో ఉన్నాడు.
- మరో ఆస్ట్రేలియన్ ఆటగాడు మార్నస్ లుబుషేన్ 849 పాయింట్లతో ఐదో స్థానంలో కొనసాగుతున్నాడు. కాగా టాప్ 5లో ముగ్గురు ఆసిస్ బ్యాటర్లు ఉండటం విశేషం.
ICC Test Bowler Rankings : బౌలర్లలో టీమ్ఇండియా స్పిన్ మాంత్రికుడు రవిచంద్రన్ అశ్విన్ 860 పాయింట్లతో టాప్లో ఉన్నాడు. అతడి తర్వాత కమిన్స్ (828 పాయింట్లు), రబాడ (825 పాయింట్లు) వరుస స్థానాల్లో కొనసాగుతున్నారు. కాగా టీమ్ఇండియా పేస్ బౌలర్ జస్ప్రీత్ బుమ్రా (772 పాయింట్లు), లెఫ్ట్ఆర్మ్ స్పిన్నర్ రవీంద్ర జడేజా (765 పాయింట్లు) తొమ్మిది, పది స్థానాల్లో ఉన్నారు.