ICC Prize Money News: ఐసీసీ నిర్వహించే టోర్నీల్లో పురుషులు, మహిళల జట్లకు అందించే ప్రైజ్‌మనీలో ఉన్న అంతరాన్ని తగ్గించేందుకు చర్చలు జరుగుతున్నాయని అంతర్జాతీయ క్రికెట్ మండలి చీఫ్‌ ఎగ్జిక్యూటివ్‌ గెఫ్ అలార్డెస్ తెలిపారు. ప్రస్తుతం న్యూజిలాండ్‌ వేదికగా జరుగుతున్న ఉమెన్స్ ప్రపంచకప్‌లో విజేతకు 1.32 మిలియన్‌ డాలర్ల ప్రైజ్మనీ అందనుంది. ఇది 2019 పురుషుల వరల్డ్‌కప్‌ ఛాంపియన్‌కు దక్కిన ప్రైజ్‌మనీలో (4.8 మిలియన్‌ డాలర్లు) మూడో వంతు కావడం గమనార్హం. ఈ క్రమంలో 2024-2032 వరకు జరిగే పురుషుల, మహిళల ఈవెంట్లకు సంబంధించి ప్రైజ్‌మనీని సమానంగా అందించేందుకు అపెక్స్ కమిటీ చర్చించిందని ఐసీసీ చీఫ్‌ ఎగ్జిక్యూటివ్‌ పేర్కొన్నారు.
"ప్రైజ్మనీ అంశంపై సుదీర్ఘంగా చర్చిస్తున్నాం. అంతేకాకుండా మహిళల ప్రస్తుతం ఎనిమిది జట్లతో జరుగుతున్న ప్రపంచకప్‌లో మరో రెండింటిని చేర్చడానికి ఇంకొంత సమయం పట్టే అవకాశం ఉంది. 2029 నాటికి పది జట్లతో ప్రపంచకప్‌ను నిర్వహించేందుకు అవకాశాలు ఉన్నాయి. ఎనిమిది మంది తల్లులు వరల్డ్‌ కప్‌ పోటీల్లో పాల్గొనడం చాలా ఆనందంగా ఉంది. పోటీతత్వం పెరగడం ఆహ్వానించదగిన విషయం. దీనికి తగ్గట్టుగా వారికి సదుపాయాలు కల్పించాం" అని గెఫ్ అలార్డెస్ వ్యాఖ్యానించారు.