'టీవీలో సచిన్ ఆట చూసి ఆ షాట్లు నేర్చుకున్నా'

టీవీలో సచిన్ ఆటను చూసి తాను క్రికెట్ షాట్లు నేర్చుకున్నట్లు తెలిపాడు మాజీ క్రికెటర్​ వీరేంద్ర సెహ్వాగ్. ఫుట్​ వర్క్​ను మెరుగుపరుచుకోవడంలో శ్రీకాంత్​, గావస్కర్​, పటౌడీ వంటి క్రికెటర్లు సాయపడ్డారని పేర్కొన్నాడు.

టీవీలో సచిన్​ తెందూల్కర్​ ఆటను చూసి తాను పలు క్రికెట్​ షాట్లు నేర్చుకున్నానని వెల్లడించాడు మాజీ డాషింగ్ ఓపెనర్​ వీరేంద్ర సెహ్వాగ్. స్ట్రైట్​ డ్రైవ్​తో పాటు బ్యాక్​ఫుట్​ షాట్లు ఇలా తెలుసుకున్నవేనని చెప్పాడు.

"1992 ప్రపంచకప్​ సందర్భంగా నేను టీవీలో క్రికెట్ చూశా. అందులో చూసి సచిన్​ ఆడుతున్న స్ట్రైట్​ డ్రైవ్​ను నేర్చుకున్నా. ఈ రోజుల్లో యువ ఆటగాళ్లకు చాలా వీడియోలు అందుబాటులో ఉన్నాయి. వివిధ రకాల క్రికెట్​ షాట్లను తెలుసుకునే అవకాశం ఉంది. ఇలాంటి సౌకర్యాలు మా రోజుల్లో ఉంటే నేను త్వరగానే భారత జట్టుకు ఎంపికయ్యేవాడిని."

-వీరేంద్ర సెహ్వాగ్, టీమ్ఇండియా మాజీ క్రికెటర్.

"నా కెరీర్​ ప్రారంభంలో చాలా మంది ఫుట్​వర్క్​ను మెరుగుపరుచుకోవాలనేవారు. కానీ, ఎలా అనేది మాత్రం చెప్పేవారు కాదు. మన్సూర్​ అలీ ఖాన్​ పటౌడీ, సునీల్ గావస్కర్, క్రిష్ణమాచారి శ్రీకాంత్​.. ఈ విషయంలో సహాయం చేశారు" అని సెహ్వాగ్​ పేర్కొన్నాడు.

ఇదీ చదవండి:Tweet controversy: వివాదంలో మరో ఇద్దరు క్రికెటర్లు