Harbhaja Retirement: టీమ్ఇండియా వెటరన్ ఆఫ్ స్పిన్నర్ హర్భజన్ సింగ్ శుక్రవారం ఆటకు రిటైర్మెంట్ ప్రకటించాడు. 23 ఏళ్ల పాటు తన స్పిన్ మాయాజాలంతో కోట్లాది మంది అభిమానుల్ని మంత్రముగ్ధుల్ని చేసిన భజ్జీ అన్ని ఫార్మాట్లకు వీడ్కోలు పలుకుతూ నిర్ణయం తీసుకున్నాడు. 1998లో ఆస్ట్రేలియాపై టెస్టు అరంగేట్రం చేసిన ఈ పంజాబ్ బౌలర్.. అదే ఏడాది కివీస్పై వన్డేల్లోకి అడుగుపెట్టాడు.
విభిన్న శైలి
హర్భజన్ పేరు చెప్పగానే గుర్తుకొచ్చేది అతడి బౌలింగ్ శైలి. పాము మెలికలు తిరుగుతున్నట్లు తన చేతిని, శరీరాన్ని కదుపుతూ అతడు వేసే బంతుల్ని ప్రత్యర్థి బ్యాటర్లు అంచనా వేయడం అంత సులువు కాదు. తన బౌలింగ్తో తనకంటూ మంచి గుర్తింపు తెచ్చుకున్నాడు భజ్జీ.
సంబరాల్లో ముందుంటాడు
మన బౌలర్ ప్రత్యర్థి బ్యాటర్ వికెట్ తీస్తే.. లేదా మన బ్యాటర్ మైదానంలో మెరుపులు మెరిపిస్తుంటే ముందుగా సంబరపడే ఆటగాళ్లలో హర్భజన్ ఒకరు. ఫీల్డింగ్లో అయితే చెప్పనక్కర్లేదు. వికెట్ పడగానే.. తన ముఖంలో కనపడే ఆనందం టీవీల్లో మ్యాచ్ చూస్తున్న వీక్షకుల ముఖాలను తాకుతుంది. ఆ సంబరాలు ప్రేక్షకులను ఎంటర్నైట్ చేస్తూనే, స్ఫూర్తిని రగిలిస్తాయి.
ఎన్నో ఘనతలు
భజ్జీ తన కెరీర్లో 103 టెస్టులతో పాటు 236 వన్డేలు, 28 టీ20లకు ప్రాతినిధ్యం వహించాడు. సుదీర్ఘ ఫార్మాట్లో 417 వికెట్లు తీసిన ఈ ఆఫ్ స్పిన్నర్.. 50 ఓవర్ల ఫార్మాట్లో 269 వికెట్లు తన ఖాతాలో వేసుకున్నాడు. టీమ్ఇండియా తరఫున అనిల్ కుంబ్లే తర్వాత అత్యంత విజయవంతమైన స్పిన్నర్ భజ్జీనే కావడం విశేషం. అలాగే 2007 టీ20 ప్రపంచకప్తో పాటు 2011 వన్డే వరల్డ్కప్ను గెలిచిన భారత జట్టులో హర్భజన్ సభ్యుడు. నాలుగు సార్లు ఐపీఎల్ గెలిచిన ముంబయి ఇండియన్స్ జట్టుకూ ప్రాతినిధ్యం వహించాడు.
ఈడెన్ హీరో భజ్జీ
ఈడెన్ గార్డెన్స్ వేదికగా 2001లో ఆసీస్తో జరిగిన టెస్టు మ్యాచ్ను క్రికెట్ అభిమానులు అంత త్వరగా మర్చిపోలేరు. ఆ మ్యాచ్లో భారీ డబుల్ సెంచరీతో చిరకాలం గుర్తుండిపోయే ఇన్నింగ్స్ ఆడిన లక్ష్మణ్ తర్వాత మరో హీరో భజ్జీనే. ఈ టెస్టులో హ్యాట్రిక్తో మెరిసిన ఈ వెటరన్ స్పిన్నర్.. సుదీర్ఘ ఫార్మాట్లో ఈ ఘనత సాధించిన తొలి భారత బౌలర్గా నిలిచాడు. మొత్తంగా ఈ సిరీస్లో 32 వికెట్లు పడగొట్టాడు. మూడు మ్యాచ్ల సిరీస్లో అత్యధిక వికెట్లు తీసిన రికార్డు భజ్జీ పేరిటే ఉంది.
రికార్డుల రారాజు
Harbhaja Retirement records: టీ20 ఫార్మాట్ అంటేనే బ్యాటర్లకు పండగ. అలాంటిది ఓ మ్యాచ్లో ఎక్కువ మెయిడెన్ ఓవర్లు వేసిన తొలి బౌలర్గా భజ్జీ సరికొత్త ఫీట్ నమోదు చేశాడు. 2012 పొట్టి ప్రపంచకప్లో భాగంగా జట్టులో చోటు దక్కించుకున్న ఇతడు.. ఇంగ్లాండ్తో జరిగిన లీగ్మ్యాచ్లో రికార్డు సృష్టించాడు. రెండు ఓవర్లు మెయిడెన్గా వేశాడు. మొత్తంగా 4 ఓవర్లు బౌలింగ్ చేసి కేవలం 12 పరుగులే ఇచ్చి.. 4 వికెట్లు తీశాడు. ఈ మ్యాచ్లో ఇంగ్లాండ్ 80 పరుగులకే కుప్పకూలింది. తర్వాతి రోజుల్లో భువనేశ్వర్, బుమ్రా.. భజ్జీ సరసన చేరారు.
