Harbhajan Singh 2011 world cup: టీమిండియా మేటి స్పిన్నర్లలో హర్భజన్ సింగ్ ఒకడు. సుమారు రెండు దశాబ్దాల పాటు మూడు ఫార్మాట్లలో అద్భుత ప్రదర్శనతో తనదైన ముద్ర వేశాడు. 2007 ఐసీసీ టీ20 ప్రపంచ కప్, 2011 వన్డే ప్రపంచ కప్లో తన ఆఫ్స్పిన్ మాయాజాలంతో తన వంతు పాత్ర పోషించాడు. 1983 తర్వాత ధోనీ సారథ్యంలోనే 2011లో ప్రపంచకప్ గెలిచింది టీమిండియా. ఫైనల్లో 91 పరుగులు చేసి జట్టుకు విజయాన్నందించిన ధోనీపై ప్రశంసలు జల్లు కురిసింది. ముఖ్యంగా చివరి సిక్స్ అభిమానుల గుండెల్లో చిరస్థాయిగా నిలిచిపోయింది. మరోవైపు.. గౌతమ్ గంభీర్ అద్భుత ఇన్నింగ్స్ ఆడాడు. 31 పరుగులకే రెండు వికెట్లు పడిన స్థితిలో ధోనీతో కలిసి ఇన్నింగ్స్ను నిర్మించాడు. 97 పరుగులు చేసి త్రుటిలో సెంచరీ చేజార్చుకున్నాడు. అయితే.. చాలా మంది భారత్ ప్రపంచ కప్ గెలవటంపై క్రెడిట్ ధోనీకే ఇస్తూ ప్రశంసించారు. ఇలా ధోనీకి క్రెడిట్ ఇచ్చే వారికి టీమిండియా మాజీ స్పిన్నర్ హర్భజన్ సింగ్ చురకలు అంటించాడు. క్రెడిట్ మొత్తం ధోనీదేనా?.. మిగతా 10 మంది లస్సీ తాగేందుకు వచ్చారా? అంటూ ఆగ్రహం వ్యక్తం చేశాడు.
ఐపీఎల్ 2022లో రెండ్రోజుల క్రితం దిల్లీ క్యాపిటల్స్, కోల్కతా నైట్రైడర్స్ మధ్య జరిగిన మ్యాచ్పై ఓ స్పోర్ట్స్ ఛానల్ లో విశ్లేషణ సందర్భంగా ఈ వ్యాఖ్యలు చేశాడు హర్భజన్. జట్టు మొత్తం కలిసి ఆడితేనే విజయం సాధ్యమైందని స్పష్టం చేశాడు. ఈ సందర్భంలో మాజీ ఆటగాళ్లు ఇర్ఫాన్ పఠాన్, మహమ్మద్ కైఫ్లు అక్కడే ఉన్నారు.
" ఆస్ట్రేలియా ప్రపంచ కప్ గెలిస్తే ప్రతి ఒక్కరు ఆస్ట్రేలియా గెలిచింది అంటారు. భారత్ వరల్డ్ కప్ గెలిస్తే ప్రతిఒక్కరు ఎంఎస్ ధోనీ ప్రపంచ కప్ గెలిచాడని చెబుతున్నారు. అయితే.. మిగతా 10 మంది లస్సీ తాగేందుకు వెళ్లారా? మిగిలిన 10 మంది ఏం చేశారు? గౌతమ్ గంభీర్ ఏం చేశాడు? ఇతరులు ఏం చేశారు? ఇది జట్టు ఆట. 7-8 మంది ఆటగాళ్లు మంచి ప్రదర్శన చేస్తేనే టీమ్ ముందుకు వెళ్తుంది."