'టీ20 ప్రపంచకప్​పై తుదినిర్ణయం అప్పుడే'

ఐపీఎల్ వాయిదా పడటం వల్ల టీ20 ప్రపంచకప్​ నిర్వహణపై సందేహాలు వస్తున్నాయి. దీనిపై నిర్ణయం జులైలో తీసుకునే అవకాశాలు ఎక్కువగా కనిపిస్తున్నాయి. మరి భారత క్రికెట్ బోర్డు ఏం చేస్తుందో చూడాలి?

కరోనా కారణంగా ఐపీఎల్‌ నిరవధిక వాయిదా పడింది. దీంతో ఇప్పుడు అందరి దృష్టి మన దేశం ఆతిథ్యమివ్వాల్సిన టీ20 ప్రపంచకప్‌పై పడింది. అక్టోబరు-నవంబరులో జరగాల్సిన ఈ మెగా ఈవెంట్‌ను యూఏఈకి తరలించక తప్పదనే ప్రచారం జరుగుతోంది. దీనిపై స్పందించిన బోర్డు అధికారి ఒకరు.. ఈ విషయమై చర్చలు జరిపి తుది నిర్ణయం జులైలో బోర్డు తీసుకుంటుందని చెప్పారు.

"ప్రస్తుతం పరిస్థితులను పరిశీలిస్తున్నాం. జులై కన్నా ముందే ఏ నిర్ణయం తీసుకోలేం. త్వరలోనే పరిస్థితులన్నీ సద్దుమణుగుతాయని, ప్రపంచకప్​ ఇక్కడే జరుగుతుందని ఆశిస్తున్నాం. అంతకుముందు ఈ మెగా ఈవెంట్ నిర్వహించడానికి అనుకున్న తొమ్మిది వేదికలపై మరోసారి పరిశీలిస్తాం. దేశవ్యాప్తంగా ఉన్న ఇంకా మరికొన్ని వేదికల కోసం చూస్తున్నాం"

-బీసీసీఐ అధికారి.

అయితే ఈ టీ20 ప్రపంచకప్​ను యూఏఈకి తరలించొచ్చని బోర్డుకు చెందిన మరో అధికారి అన్నారు. కరోనా కారణంగా ఐపీఎల్ వాయిదా పడటం వల్ల ఈ మెగా ఈవెంట్​ను ఇక్కడ నిర్వహించే సాహసం చేయదని చెప్పారు.

ఇదీ చూడండి: టీ20 ప్రపంచకప్ నిర్వహణపై బీసీసీఐ దారెటు?