Tim Paine News: ఆస్ట్రేలియా టెస్టు జట్టు మాజీ సారథి టిమ్ పైన్ కొద్ది రోజుల పాటు క్రికెట్లోని అన్ని ఫార్మాట్లకు దూరం కానున్నాడు. భవిష్యత్తు కార్యాచరణ దృష్ట్యా అతడు ఈ నిర్ణయం తీసుకున్నట్లు క్రికెట్ టాస్మానియా తెలిపింది. సెక్స్ చాటింగ్ వివాదం(ఓ మహిళా సహోద్యోగురాలికి అసభ్యకర సందేశాలు పంపడం) కారణంగా టిమ్ పైన్ ఇటీవలే టెస్టు సారథిగా తప్పుకొంటున్నట్లు ప్రకటించాడు. త్వరలో జరిగే ఆస్ట్రేలియా, ఇంగ్లాండ్ యాషెస్ సిరీస్(Ashes series 2021) నేపథ్యంలో పైన్కు అవకాశం వస్తుందా? లేదా? అనే అంశం చర్చనీయాంశమైంది.
డిసెంబర్ 8న ప్రారంభం కానున్న యాషెస్ సిరీస్కు టిమ్ పైన్ను ఎంపిక చేయాలని పలువురు ఆసీస్ క్రికెటర్లు కోరారు. ఈ నేపథ్యంలో పైన్.. కొద్ది రోజుల పాటు క్రికెట్కు దూరంగా ఉండనున్నట్లు క్రికెట్ టాస్మానియాకు తెలిపినట్లు సమాచారం.
పైన్కు మద్దతుగా..
ఆస్ట్రేలియా ఆటగాళ్లంతా పైన్కు మద్దతుగా ఉన్నారని ఇటీవలే తెలిపాడు బౌలర్ నాథన్(Nathan lyon News). గబ్బా వేదికగా జరగనున్న తొలి టెస్టులో పైన్కు అవకాశం ఇవ్వాలని అభిప్రాయపడ్డాడు. పాట్ కమిన్స్ లేదా స్మిత్కు టెస్టు సారథి బాధ్యతలు అప్పగిస్తే బాగుంటుందని పేర్కొన్నాడు.
"యాషెస్ సిరీస్ కోసం ఉత్తమ ఆటగాళ్లను ఎంపిక చేస్తామని సెలెక్టర్లు చెప్పారు. నా దృష్టిలో టిమ్ పైన్ ప్రపంచంలోనే అత్యుత్తమ వికెట్ కీపర్. ఓ బౌలర్గా జట్టులో మంచి వికెట్ కీపర్ ఉండాలని నేను ఆశిస్తాను. బౌలర్లందరి అభిప్రాయం కూడా ఇదే."