భారత పిచ్​లపై రూట్​ పరుగుల దాహం తీరనిది

భారత పిచ్​లంటేనే స్పిన్​కు సహకరిస్తాయని తెలుసు. వీటిపై బ్యాటింగ్​ చేయాలంటే హేమాహేమీలే భయపడేవారు. అలాంటిది ఇంగ్లాండ్​ కెప్టెన్​ జో రూట్​ మాత్రం మంచినీళ్లు తాగినంత సులభంగా పరుగులు చేసేస్తున్నాడు. ఓ సారి ఉపఖండ(ఆసియా దేశాలు) పిచ్​లపై అతడి రికార్డులు పరిశీలిద్దామా మరి.

కెరీర్​లోనే అత్యుత్తమ ఫామ్​లో ఉన్న ఇంగ్లాండ్​ కెప్టెన్​ జో రూట్​.. ఉపఖండ పిచ్​లంటే పండగ చేసుకుంటున్నాడు. ఇటీవల కాలంలో ఆసియా దేశాలైన పాకిస్థాన్​, బంగ్లాదేశ్​, శ్రీలంకలతో పలు సిరీస్​లు ఆడిన ఈ ఇంగ్లాండ్ కెప్టెన్​.. ప్రస్తుత భారత పర్యటనలోనూ అదరగొడుతున్నాడు. ఇక్కడి పిచ్​లపై ఎంతలా చేలరేగుతున్నాడనేది అతడి బ్యాటింగ్​ సగటు పరిశీలిస్తే అర్థమవుతుంది.

భారత్​లో భారత్​పై..

టీమ్​ఇండియాతో 2012లో తొలి టెస్టు ఆడాడు రూట్.​ మొత్తంగా ఇప్పటివరకు 17 టెస్టు​లాడి​.. 62.19 సగటుతో 1,679 పరుగులు చేశాడు. ఇండియాతో ఇండియాలో 7 మ్యాచ్​లాడిన ఈ ఇంగ్లాండ్ కెప్టెన్​ 64.77 సగటుతో 842 పరుగులు చేసి జోరు మీదున్నాడు. మొత్తం సగటు కంటే భారత్​లో భారత్​పై ఆడిన సగటే ఎక్కువ ఉండటం విశేషం.

జో రూట్

ఇక చెన్నై ఎంఏ చిదంబరం స్టేడియం కూడా రూట్​కు బాగానే కలిసొస్తుంది. తాజాగా జరిగిన తొలి టెస్టులో 258 పరుగులు చేసిన ఈ ఇంగ్లీష్ క్రికెటర్​.. మొత్తంగా 88 సగటుతో 352 పరుగులు సాధించాడా స్టేడియంలో.

విశాఖతో సహా మొహలీ, రాజ్​కోట్​, నాగ్​పుర్​లోని విదర్భ స్టేడియం, ముంబయిలోని వాంఖడే స్టేడియాలూ రూట్​కు అచ్చొచ్చినవి. ఆ మైదానాల్లో వరుసగా 78, 93, 128, 93, 98 పరుగులు సాధించాడు.

జో రూట్​

ఉపఖండం పిచ్​లపై..

• శ్రీలంకతో ఇప్పటివరకు 5 టెస్టులాడిన రూట్​.. 65.50 సగటుతో 655 రన్స్​ చేశాడు.
• బంగ్లాదేశ్​తో రెండు మ్యాచ్​లు మాత్రమే ఆడి 24.50 సగటుతో 98 పరుగులు సాధించాడు.
• యూఏఈలో పాకిస్థాన్​తో 3 టెస్టులు ఆడిన రూట్​, 287 రన్స్​ తన ఖాతాలో వేసుకున్నాడు.
• ఉపఖండం పిచ్​లపై గత ఆరు మ్యాచ్​ల్లో 40, 218, 11, 186, 1, 228 పరుగులు చేశాడు.

ఇప్పటివరకు ఇంగ్లాండ్​ తరఫున 100 టెస్టులు ఆడి 8,507 రన్స్​ చేశాడు. అందులో 20 శతకాలతో పాటు 49 అర్ధ శతకాలు ఉన్నాయి. 5 డబుల్​ సెంచరీలు కూడా చేశాడు. అత్యధిక పరుగులు చేసిన ఇంగ్లీష్​ బ్యాట్స్​మెన్లలో రూట్ మూడో స్థానంలో ఉన్నాడు.

ఇదీ చదవండి:ఆర్​సీబీ బ్యాటింగ్​ సలహాదారుగా సంజయ్​ బంగర్​