'జట్టు గురించే ఆలోచిస్తా.. విమర్శలు పట్టించుకోను'

ఇంగ్లాండ్​తో తొలి టెస్టులో తన బ్యాటింగ్​ వైఫల్యంపై వస్తున్న విమర్శలకు రహానె స్పందించాడు. గత పది పదిహేను టెస్టు మ్యాచ్​ల స్కోర్లు చూస్తే తాను సాధించిన పరుగులు కనిపిస్తాయని బదులిచ్చాడు. జట్టుకు ఎలా ఉపయోగపడాలన్నది మాత్రమే ఆలోచిస్తానని.. విమర్శల గురించి పట్టించుకోనని తెలిపాడు.

తొలి టెస్టులో వైఫల్యంపై వస్తున్న విమర్శలకు టీమ్​ఇండియా వైస్​కెప్టెన్​ ఆజింక్య రహానె ఘాటుగా బదులిచ్చాడు. చెన్నైలో రెండో టెస్టు ఆరంభానికి ముందు విలేకరుల సమావేశంలో తన ఫామ్​పై ప్రశ్నకు బదులిచ్చాడు.

"రెండేళ్ల తర్వాత సొంతగడ్డపై ఆడుతున్నాం. భారత్‌లో చివరిసారిగా 2019లో దక్షిణాఫ్రికాతో తలపడ్డాం. ఆ సిరీస్‌లో నా స్కోర్లు (59, 115) గమనిస్తే మీకే తెలుస్తుంది. అందరం ఆడేది జట్టు కోసమే. జట్టుకు ఏ విధంగా సహకరించగలను అన్నదానిపైనే నా దృష్టంతా. గత 10-15 టెస్టులు గమనిస్తే నేను సాధించిన పరుగులు కనిపిస్తాయి. విమర్శల గురించి ఆలోచించాల్సిన అవసరం లేదు. కొన్నిసార్లు సరిగా ఆడలేకపోవచ్చు. సారథ్యం మార్పు వల్లే అలా జరిగిందనుకోవడం సరికాదు. ఇంతకుముందు చెప్పినట్లుగా విరాటే మా నాయకుడు. జట్టులో రోహిత్​ శర్మ ముఖ్యమైన ఆటగాడు. గతంలో ఎన్నోసార్లు టీమ్​కు విజయాలు అందించాడు. అతడు క్రీజులో కుదురుకుంటే మ్యాచ్​లు గెలిపిస్తాడు" అని రహానె వివరించాడు.

ఇదీ చదవండి:తెలంగాణ, ఏపీలో ధోనీ క్రికెట్ అకాడమీ