Domestic cricketers match fees: కరోనా వల్ల మ్యాచ్లు జరగక ఆర్ధిక ఇబ్బందులు ఎదుర్కొన్న దేశవాళీ క్రికెటర్లకు శుభవార్త. వారికి చెల్లించాల్సిన పరిహారాన్ని ఇవ్వడం ప్రారంభించింది బీసీసీఐ. ఈ విషయాన్ని బీసీసీఐ అధికారి ఒకరు తెలిపారు.
"గత సీజన్ ఎర్ర బంతి టోర్నీ జరగని నేపథ్యంలో ఆటగాళ్లకు పరిహారాన్ని ఇవ్వడం ప్రారంభించింది బీసీసీఐ. ఇప్పటికే చాలామంది ప్లేయర్లకు డబ్బులు అందాయి. మిగతా వారికి కూడా అందించి మరికొన్ని వారాల్లో ఈ ప్రక్రియను పూర్తి చేస్తాం"
-బీసీసీఐ అధికారి.
గత సీజన్లో కరోనా వల్ల దేశవాళీ క్రికెట్ చరిత్రలో తొలిసారి రంజీ ట్రోఫీని నిర్వహించలేదు. మహిళల టీ20 టోర్నీ కూడా జరగలేదు. దీంతో చాలామంది క్రికెటర్లు ఆర్ధికంగా ఇబ్బందులు ఎదుర్కొన్నారు. 2019-20 సీజన్లో పాల్గొన్న ఆటగాళ్లకు 2020-21కు సంబంధించిన మ్యాచ్ ఫీజులో 50 శాతం.. కాంపెన్సేషన్గా(పరిహారం) ఇస్తామని గతేడాది సెప్టెంబరులో ప్రకటించింది బీసీసీఐ. ఇప్పుడు దానినే ఆటగాళ్లకు చెల్లించడం ప్రారంభించింది బోర్డు.
గతేడాది సెప్టెంబరులో జరిగిన అపెక్స్ కౌన్సిల్ మీటింగ్లో సీనియర్ ఆటగాళ్ల జీతాలను పెంచాలని బోర్డు నిర్ణయించింది. దీంతో ఒక రోజుకు పురుషులు రూ.40-60వేలు, మహిళలు రూ.20 వేలు అందుకుంటారు.
ఇదీ చూడండి: 'బుమ్రా వైస్కెప్టెన్ అవ్వడం ఆశ్చర్యమేసింది'
