బంగ్లాదేశ్‌తో తొలి వన్డేలో టీమ్ఇండియా ఓటమిపై సీనియర్‌ వికెట్‌ కీపర్‌ దినేశ్ కార్తిక్ అసంతృప్తి వ్యక్తం చేశాడు. ఇంత దారుణమైన ఫీల్డింగ్‌ను తాను ఊహించలేదని విమర్శించాడు. కేఎల్ రాహుల్ సంగతి పక్కనపెడితే.. వాషింగ్టన్ సుందర్ కనీసం క్యాచ్ పట్టేందుకు ప్రయత్నించకపోవడం తనను ఆశ్చర్యానికి గురిచేసిందన్నాడు.
"అవును, చివరి ఓవర్‌లో కేఎల్ రాహుల్ క్యాచ్‌ను వదిలేశాడు. కానీ, సుందర్ బంతిని క్యాచ్ పట్టేందుకు ఎందుకు ముందుకు రాలేదో అర్థం కాలేదు. అక్కడున్న లైటింగ్‌ కారణంగా బంతిని చూడలేకపోయాడా.. అనేది తెలియదు. కానీ, ఒకవేళ బంతిని చూసివుంటే వెంటనే అతడు ముందుకు కదిలివుండాలి కదా? ఈ ప్రశ్నకు సమాధానం అతడు మాత్రమే చెప్పగలడు. మొత్తానికి ఫీల్డింగ్‌ పరంగా మెప్పించలేకపోయారు. ఈ మ్యాచ్‌ అంత గొప్పగా ఆడలేదు. అలాగని మరీ చెత్తగానూ ఆడలేదు. చివరి ఓవర్‌లో కొన్ని బౌండరీలను ఒత్తిడి కారణంగా వదిలేసి ఉండవచ్చు" అంటూ దినేశ్ తెలిపాడు.