టెస్టు ఛాంపియన్‌షిప్‌ ఫైనల్‌ రేసు నేపథ్యంలో బంగ్లాదేశ్‌ సిరీస్‌లో దూకుడుగా ఆడాల్సిన అవసరం ఉందని కేఎల్ రాహుల్ అన్నాడు. అయితే ఈ వ్యాఖ్యలపై సీనియర్‌ ఆటగాడు దినేశ్ కార్తిక్ తాజాగా స్పందించాడు. తాను కేఎల్ రాహుల్ వ్యాఖ్యలతో ఏకీభవించనని అన్నాడు. చట్‌గావ్‌లో ఉన్న పిచ్‌పై ఇంగ్లాండ్‌ జట్టు ఆడినట్టు బజ్‌బాల్‌ తరహా ప్రదర్శన సాధ్యం కాదని పేర్కొన్నాడు.
"నాకు తెలిసి ఇలాంటి వికెట్ ఎలాంటి ఫలితాన్ని ఇవ్వదు. సాధారణంగా నాణ్యమైన ఆటగాళ్లు లేనప్పుడు బ్యాటింగ్‌ వైఫల్యాలు బయటపడుతుంటాయి. నియంత్రణ కోల్పోకుండా ఆడితే చాలు. వికెట్‌ను కాపాడుకోవడానికి గొప్ప టెక్నిక్‌లేమీ అవసరం లేదు. ఇక ఇంగ్లాండ్‌ బజ్‌బాల్‌ క్రికెట్‌ ఆడినట్టుగా టీమ్‌ఇండియా ఆడదు. అది జట్టు డీఎన్‌ఏలోనే లేదు. నిజానికి ప్రపంచ టెస్టు ఛాంపియన్‌షిప్‌ రేసులో మంచి స్కోరుతో నిలవడానికి ఈ మ్యాచ్‌లు చాలా కీలకమైనవి. అందుకే, వేగం పెంచి ఆడాలని వారు భావిస్తున్నారు. కానీ, అందుకు ఇది సరైన సమయం కాదు. ఇక్కడ దూకుడుగా ఆడేందుకు పిచ్‌ ఏమాత్రం సహకరించదు" అని డీకే అన్నాడు.