టైటిల్ ఫేవరెట్లలో ఒకటైన ఇంగ్లాండ్ జట్టుకు షాక్ తగిలింది. ఆ జట్టు హార్డ్‌ హిట్టర్ జేసన్ రాయ్ ఇంగ్లాండ్ ఆడే తర్వాతి రెండు మ్యాచ్లకు దూరం కానున్నాడు. లార్డ్స్ వేదికగా ఈనెల 25న ఆస్ట్రేలియాతో మ్యాచ్‌కు బరిలోకి దిగే అవకాశం ఉందని జట్టు యాజమాన్యం తెలిపింది.
జూన్ 14న వెస్టిండీస్‌తో మ్యాచ్లో ఫీల్డింగ్ చేస్తుండగా తొడ కండరాలు పట్టేయడం వల్ల మైదానాన్ని వీడాడు జేసన్. కేవలం 8 ఓవర్లు మాత్రమే ఫీల్డింగ్ చేసిన రాయ్... ఆ తర్వాత కూడా బ్యాటింగ్‌కు రాలేదు. శనివారం రాత్రి అతని ఎడమ తొడకు స్కానింగ్ తీశారు. నివేదికలను ఆదివారం పరిశీలించిన వైద్యులు... తొడ కండరాల్లో చీలికలు వచ్చినట్లు గుర్తించారు. మంగళవారం ఆఫ్గానిస్థాన్, శుక్రవారం శ్రీలంకతో ఇంగ్లాండ్ తలపడనుంది.