ప్రపంచకప్లో భారత్పై పాకిస్థాన్ దారుణ పరాభవానికి పాకిస్థాన్ మాజీ ఫాస్ట్ బౌలర్ షోయబ్ అక్తర్ తీవ్రంగా కలత చెందాడు. ప్రపంచకప్లో ఈ పాక్ జట్టు నుంచి ఎక్కువ ఆశించొద్దని అభిమానులకు సూచించాడు.
ఆదివారం మాంచెస్టర్లోని ఓల్డ్ ట్రాఫోర్డ్ వేదికగా టీమిండియాతో తలపడిన పాక్.... డక్వర్త్ లూయిస్ ప్రకారం 89 పరుగుల తేడాతో ఓడిపోయింది. ప్రపంచకప్లో ఏడవ ఓటమిని నమోదు చేసుకున్న జట్టుపై పాక్ మాజీ క్రికెటర్ షోయబ్ అక్తర్ దారుణంగా విమర్శలు చేశాడు. సారథి సర్ఫరాజ్ టాస్ గెలిచి బౌలింగ్ ఎంచుకోవడంపై మండిపడ్డాడు. ఫాస్ట్ బౌలర్ హసన్ అలీపైనా విరుచుకుపడ్డాడు అక్తర్. హసన్కు టీ20లు, పాక్ ప్రీమియర్ లీగ్లో ఆడటంపై ఉన్న దృష్టి... దేశం కోసం ఆడటంలో లేదంటూ విమర్శలు కురిపించాడు.
ఛేజింగ్లో చెత్త రికార్డు అయినా ఎంచుకున్నావ్...
టాస్ గెలిచిన పాకిస్థాన్ మొదట భారత్ను బ్యాటింగ్కు ఆహ్వానించగా... టీమిండియా నిర్ణీత 50 ఓవర్లలో 5 వికెట్లు కోల్పోయి 336 పరుగుల లక్ష్యం నిర్దేశించింది. ఛేదనలో పాక్ జట్టు 40 ఓవర్లకు 6 వికెట్లు కోల్పోయి 212 పరుగులు మాత్రమే చేయగలిగింది.
పాక్ ఆటగాళ్ల ప్రదర్శనపై ఆగ్రహం చెందిన షోయబ్ అక్తర్... కెప్టెన్, మేనేజిమెంటుపై తీవ్ర ఆరోపణలు చేస్తూ ఆగ్రహం వెళ్లగక్కాడు. సర్ఫరాజ్ ఖాన్ బ్రెయిన్ లేని కెప్టెన్ అని అందుకే టాస్ గెలిచినా బౌలింగ్ తీసుకున్నాడని సంబోధించాడు.
"2017 ఛాంపియన్స్ ట్రోఫీ ఫైనల్లో భారత్ చేసిన తప్పే పాక్ జట్టు చేసింది. సర్ఫరాజ్ఖాన్ ఇంత మెదడు లేనివాడని నాకు తెలియదు. ఛేజింగ్లో పాక్కు సరైన రికార్డు లేదని తెలిసినా ఎలా బౌలింగ్ ఎంచుకున్నాడు. టాస్ గెలిచినపుడే పాక్ సగం విజయం సాధించినట్టు కానీ చాలా కష్టపడి మ్యాచ్ను ఓడించాడు. బౌలింగ్ పాకిస్థాన్ బలం. పాక్ మొదట బ్యాటింగ్ చేసి 260 చేసినా బౌలింగ్తో వాటిని కాపాడుకోగలదు. కాని అవేమి ఆలోచించని సర్ఫరాజ్ ఖాన్ ఓ బ్రెయిన్లెస్ కెప్టెన్. ఓ సారథిగా జట్టుకు ఘోర పరాభవాన్ని అందించాడు ".
--అక్తర్, పాకిస్థాన్ మాజీ క్రికెటర్
ఈ మ్యాచ్లో పేసర్ హసన్ అలీ 9 ఓవర్లు వేసి 84 పరుగులు సమర్పించకున్నాడు. దీనిపైనా అక్తర్ మాటలదాడికి దిగాడు. పాకిస్థాన్ అభిమానులు ఈ సాధారణ పాకిస్థానీ ఆటగాళ్ల నుంచి ఎక్కువ ఆశించకండి అంటూ సూచించాడు.సర్ఫరాజ్కు పదో తరగతి పిల్లాడికి ఉన్న జ్ఞానం కూడా లేదని... పాక్ జట్టు గెలిచేందుకు మేనేజిమెంటు, కోచ్ మైక్ ఆర్థర్లు ఏం సలహాలు ఇచ్చారని మండిపడ్డాడు. జట్టులో స్ఫూర్తి నింపుతూ పాక్ ప్రధాని ఇమ్రాన్ ఖాన్ ట్వీట్లు చేశారు. అతడి మాటలనూ పట్టించుకోలేదు అందుకే ఓటమి తప్పలేదని అభిప్రాయపడ్డాడు.
పాకిస్థాన్ ఐదు మ్యాచ్ల్లో ఒక్కటి గెలిచి, మరోటి వర్షం కారణంగా రద్దవ్వడం వల్ల 3 పాయింట్లతో చివరి నుంచి రెండో స్థానంలో నిలిచింది. తర్వాతి మ్యాచ్లో దక్షిణాఫ్రికాతో ఆదివారం లార్డ్స్లో తలపడనుంది.
