న్యూజిలాండ్తో జరిగిన ప్రపంచకప్ సెమీస్ మ్యాచ్లో భారత్ ఓడినప్పటికీ జడేజా, ధోనీ అద్భుతంగా ఆడారని ప్రశంసలు వెల్లువెత్తుతున్నాయి. అయితే ఇంతకు ముందు జడేజాపై తీవ్ర విమర్శలు చేసిన వ్యాఖ్యాత సంజయ్ మాంజ్రేకర్.. ఈ మ్యాచ్లో జడేజా బాగా ఆడాడని ట్వీట్ చేశాడు. దీనిపై సామాజిక మాధ్యమాల్లో నెటిజన్లు ఆగ్రహం వ్యక్తం చేస్తున్నారు.
జడేజా నువ్వు అనుకున్న జట్టులో లేకపోయినా.. సెమీస్లో చక్కటి ప్రదర్శనతో ఆకట్టుకున్నాడు. ఇప్పుడేమంటావ్ మాంజ్రేకర్ అంటూ ఒకరు ట్వీట్ చేశారు.
బిట్స్ అండ్ పీసెస్ క్రికెటర్కు నువ్వు(మాంజ్రేకర్) లిఖిత పూర్వకంగా క్షమాపణలు చెప్పాలి అంటూ మరొకరు కామెంట్ పెట్టారు.
అసలు ఏం జరిగిందంటే..
లీగ్లో బంగ్లాదేశ్ మ్యాచ్ సందర్భంగా రవీంద్ర జడేజాపై మాంజ్రేకర్ నోరు పారేసుకున్నాడు. దీనికి కౌంటర్ ఇచ్చాడు జడ్డూ. అనంతరం శ్రీలంక మ్యాచ్లో కుశాల్ మెండిస్ వికెట్ తీసిన జడేజాను వ్యాఖ్యాతగా ఉన్న సంజయ్ "స్మార్ట్ గల్లీ క్రికెటర్" అంటూ సంబోధించాడు. ఈ అంశంపై నెటిజన్లు ఆగ్రహం వ్యక్తం చేశారు.
"జడేజా లాంటి బిట్స్ అండ్ పీసెస్ ఆటగాళ్లకు నేను అభిమానిని కాదు, అతడు నా జట్టులోనే ఉండడు" అని విమర్శించాడు.
అయితే మాంజ్రేకర్ వ్యాఖ్యలకు జడైజా ఘాటుగా స్పందించాడు. ఆటగాళ్లను గౌరవించడం నేర్చుకో.. నీ చెత్త వాగుడు ఆపు అంటూ ట్వీట్ చేశాడు.
మాంచెస్టర్ వేదికగా న్యూజిలాండ్తో జరిగిన మ్యాచ్లో భారత్ 18 పరుగుల తేడాతో ఓడింది. జడేజా 77 పరుగులతో ఆకట్టుకున్నాడు. వరల్డ్కప్ టోర్నీలో 8వ స్థానంలో వచ్చి అర్ధశతకం సాధించిన మొదటి భారత బ్యాట్స్మన్గా జడేజా రికార్డు సృష్టించాడు.
