పాకిస్థాన్ - దక్షిణాఫ్రికా హెలెట్స్ టీమిండియాతో ఓటమి పాలై విమర్శలు మూటగట్టుకున్న పాకిస్థాన్ తర్వాతి మ్యాచ్లో సత్తా చాటింది. దక్షిణాఫ్రికా జట్టుపై బంతితోనూ, బ్యాట్తోనూ ఆధిపత్యం ప్రదర్శించి జయకేతనం ఎగురవేసింది. సఫారీలపై 49 పరుగుల తేడాతో విజయం సాధించి పాయింట్ల పట్టికలో 7వ స్థానంలో నిలిచింది. 309 పరుగుల భారీ లక్ష్య ఛేదనలో దక్షిణాఫ్రికా బ్యాట్స్మెన్లు నిర్ణీత 50 ఓవర్లలో 9 వికెట్లు కోల్పోయి 259 పరుగులు మాత్రమే చేశారు. డుప్లెసిస్ అర్ధశతకంతో రాణించగా... డికాక్, ఫెలుక్వాయో మంచి ఇన్నింగ్స్ ఆడినా దక్షిణాఫ్రికాను ఓటమి నుంచి తప్పించలేకపోయారు. సఫారీలపై విజయంతో పాక్ సెమీస్ ఆశలు సజీవంగా నిలుపుకొంది.
సారథి ఒంటరి పోరాటం...
309 పరుగుల భారీ లక్ష్య ఛేదనలో ఆరంభంలోనే సఫారీలకు ఎదురుదెబ్బ తగిలింది. స్టార్ బ్యాట్స్మెన్ ఆమ్లా.. ఆమిర్ బౌలింగ్లో ఎల్బీగా ఔటయ్యాడు. డుప్లెసిస్తో మంచి ఇన్నింగ్స్ నిర్మించి జోరు పెంచే క్రమంలో... భారీ షాట్కు యత్నించి వెనుదిరిగాడు డికాక్. మార్కరమ్ 7 పరుగులకే ఔటవ్వడం వల్ల ఒత్తిడిలో పడింది ప్రొటీస్ జట్టు. కీలక సమయంలో సారథి డుప్లెసిస్ 79 బంతుల్లో 63 పరుగులు చేసి ఔటయ్యాడు. చివర్లో డుస్సెన్ (36), మిల్లర్ (31), ఫెలుక్వాయో (46), మోరిస్ (16) కాస్త ఫర్వాలేదనిపించినా పెద్ద భాగస్వామ్యాలు నెలకొల్పలేకపోయారు.
వరుస ఓవర్లలో మూడు...
పాక్ బౌలర్ రియాజ్ చివరిగా వేసిన తన మూడు ఓవర్లలో 3 వికెట్లు తీశాడు. ఔటైన అందరినీ బౌల్డ్ చేయడం విశేషం. 44వ ఓవర్లో మోరిస్, 46వ ఓవర్లో రబాడ, 48వ ఓవర్లో ఎన్గిడి వికెట్లు తీసుకున్నాడు.
పాక్ బౌలర్లలో ఆమిర్ మరోసారి 2 కీలక వికెట్లు తీసి సత్తా చాటాడు. మరో బౌలర్ షాదాబ్ ఖాన్ 3 వికెట్లు సాధించాడు. ఈ మ్యాచ్తో కెరీర్లో 50 వికెట్లు పూర్తి చేసుకున్నాడు షాదాబ్. మరో బౌలర్ షాహిన్ అఫ్రిది ఒక వికెట్ తన ఖాతాలో వేసుకున్నాడు.
సోహేల్ మ్యాన్ ఆఫ్ ద మ్యాచ్...
ఓపెనర్ ఇమాముల్ హక్ 44 పరుగులు ( 58 బంతుల్లో; 6 ఫోర్లు) ఫకర్ జమాన్ 44 పరుగులు ( 50 బంతుల్లో; 6 ఫోర్లు, 1 సిక్సర్) చేసి మంచి ఆరంభాన్నిచ్చారు. తొలి వికెట్గా జమాన్ ఔటయ్యాక క్రీజులోకి వచ్చిన బాబర్ అజాం 69 పరుగులు ( 80 బంతుల్లో; 7 ఫోర్లు) మంచి ఇన్నింగ్స్ ఆడాడు. పాక్ మిడిలార్డర్ బ్యాట్స్మెన్ హారిస్ సోహేల్ 89 పరుగులు (59 బంతుల్లో; 9 ఫోర్లు, 3 సిక్సర్లు) వేగవంతమైన బ్యాటింగ్ వల్లే 300 పైచిలుకు లక్ష్యం ప్రత్యర్థి ముందు ఉంచగలిగింది పాక్. కష్టాల్లో ఉన్న సమయంలో క్రీజులో అడుగుపెట్టి సిక్సర్లు, ఫోర్లతో భారీగా పరుగులు రాబట్టాడు హారిస్. ఫలితంగా నిర్ణీత 50 ఓవర్లలో 7 వికెట్ల నష్టానికి 308 పరుగులు చేసింది పాక్. సోహేల్ 150.84 స్ట్రైక్ రేటుతో ప్రపంచకప్లో అత్యుత్తమ గణాంకాల్ని నమోదు చేశాడు.
సోహేల్ ఈ మ్యాచ్లో 89 పరుగులు చేయగా... అతడి జెర్సీ నంబర్ 89 కావడం విశేషం.
దక్షిణాఫ్రికా బౌలర్లలో ఎన్గిడి 3 వికెట్లు, తాహిర్ 2 వికెట్లు ఏయిడెన్‌ మార్‌క్రమ్‌, ఫెలుక్వాయో తలో వికెట్ తమ ఖాతాలో వేసుకున్నారు. తాహిర్ ఈ మ్యాచ్లో ప్రపంచకప్లో అత్యధిక వికెట్లు తీసిన దక్షిణాఫ్రికా బౌలర్ల జాబితాలో చోటు దక్కించుకున్నాడు.
