లండన్లోని లార్డ్స్ మైదానంలో పరుగుల వరద పారింది. టాస్‌ గెలిచి బ్యాటింగ్కు దిగిన పాకిస్థాన్ జట్టు నిర్ణీత 50 ఓవర్లలో 7 వికెట్లు కోల్పోయి 308 పరుగులు చేసింది. సఫారీలు గెలవాలంటే 309 పరుగులు చేయాల్సి ఉంది. ఓపెనర్లు సహా బాబర్, సోహేల్ సమష్టిగా పోరాడి భారీ స్కోరు దిశగా పాక్ జట్టును నడిపించారు.
ఆరంభం అదిరె...
ఓపెనర్ ఇమాముల్ హక్ 44 పరుగులు ( 58 బంతుల్లో; 6 ఫోర్లు) ఫకర్ జమాన్ 44 పరుగులు ( 50 బంతుల్లో; 6 ఫోర్లు, 1 సిక్సర్) చేసి మంచి ఆరంభాన్నిచ్చారు. తొలి వికెట్గా జమాన్ ఔటయ్యాక క్రీజులోకి వచ్చిన బాబర్ అజాం 69 పరుగులతో ( 80 బంతుల్లో; 7 ఫోర్లు) మంచి ఇన్నింగ్స్ ఆడాడు. మిడిలార్డర్లో రాణించి జట్టు భారీ స్కోరులో కీలక పాత్ర పోషించాడు.
చెలరేగిన సోహేల్...
పాకిస్థాన్ బ్యాట్స్మెన్లు హాఫీజ్ (20), ఇమాద్ వసీం(23) తక్కువ పరుగులే చేసినా వారి సహకారంతో హారిస్ సోహేల్ 89 పరుగులు(59 బంతుల్లో; 9 ఫోర్లు, 3 సిక్సర్లు) చేశాడు. వేగవంతమైన బ్యాటింగ్ వల్లే 300 పైచిలుకు లక్ష్యం ప్రత్యర్థి ముందు ఉంచగలిగింది పాక్.
- సొహేల్ 150.84 స్ట్రైక్ రేటుతో ప్రపంచకప్లో అత్యుత్తమ గణాంకాన్ని నమోదు చేశాడు. ప్రపంచకప్లో భారీ సగటుతో పరుగులు చేసిన పాక్ ఆటగాళ్ల జాబితాలో 3వ స్థానం సంపాదించాడు. ఇమ్రాన్ఖాన్(169.69), ఇంజమామ్(162.16) తర్వాత సొహేల్ ఉన్నాడు.
- 5వ స్థానం కన్నా తక్కువలో వచ్చి భారీ పరుగులు చేసిన పాక్ ఆటగాళ్ల జాబితాలో రెండో స్థానం సంపాదించాడు సొహేల్(88). గతంలో 1983 ప్రపంచకప్లో ఇమ్రాన్ఖాన్ 102 పరుగులు చేశాడు.
- 2018 జనవరి నుంచి 14 ఇన్నింగ్స్లు ఆడిన హారిస్.. 607 పరుగులు చేశాడు. వాటిలో 2 శతకాలు, 4 అర్ధశతకాలు ఉన్నాయి. 130 అత్యధిక స్కోరు.
దక్షిణాఫ్రికా బౌలర్లలో ఎన్గిడి 3 వికెట్లు, తాహిర్ 2 వికెట్లు, ఏయిడెన్‌ మార్‌క్రమ్‌, ఫెలుక్వాయో తలో వికెట్ తమ ఖాతాలో వేసుకున్నారు. ప్రపంచకప్లో ఇప్పటివరకు దక్షిణాఫ్రికా ఛేదించిన అత్యధిక స్కోరు 297 పరుగులు. 2011లో నాగపూర్లో జరిగిన మ్యాచ్లో భారత్పై ఈ ఘనత సాధించింది.
