పాకిస్థాన్.. అంచనాలకు అందకుండా.. ఎప్పుడు ఎలా ఆడుతుందో తెలియదు. ఎంత పెద్ద జట్టునైనా బోల్తా కొట్టిస్తుంది. అలాగే పసికూన జట్ల ముందు చతికిలబడుతుంది. ఈ ప్రపంచకప్లో మూడు విజయాలను నమోదు చేసిన పాక్ 1992 మెగాటోర్నీ ఫలితాలను పునరావృతం చేస్తోంది. అదే నిజమైతే కప్పు కైవసం చేసుకున్నా.. ఆశ్చర్య పోనక్కర్లేదు!
1992 వరల్డ్కప్ను సొంతం చేసుకున్న పాకిస్థాన్ ఓటమితో ఆ టోర్నీని ప్రారంభించిది. ప్రస్తుతం జరుగుతున్న ప్రపంచకప్లోనూ తొలి మ్యాచ్లో విండీస్పై ఓడింది. 1992లో రెండో మ్యాచ్ గెలిచిన పాక్.. ఈ టోర్నీలోనూ రెండో మ్యాచ్లో విజయం సాధించింది. ఆ టోర్నీలో మూడో మ్యాచ్ వర్షం కారణంగా రద్దవగా.. ఈ మెగాటోర్నీలోనూ శ్రీలంకతో జరగాల్సిన మ్యాచ్ వర్షార్పణమైంది. 1992లో తాను ఆడిన 4, 5 మ్యాచుల్లో ఓడిన పాకిస్థాన్.. ఇప్పుడూ వరుసగా ఆస్ట్రేలియా, భారత్ చేతిలో పరాజయం చెందింది. ఆ టోర్నీలో 6, 7 మ్యాచుల్లో గెలిచిన దాయాది జట్టు.. ప్రస్తుత ప్రపంచకప్లోనూ దక్షిణాఫ్రికా, కివీస్పై వరుస విజయాలను నమోదు చేసింది.