'ఆటగాళ్లందరూ సచిన్ అనే పుస్తకంలో పేజీలే'

ప్రస్తుతం ఉన్న ఆటగాళ్లలో కోహ్లీ అత్యుత్తమ క్రికెటర్ అని అభిప్రాయపడ్డాడు విండీస్ క్రికెట్ దిగ్గజం లారా. కానీ తన వరకు సచిన్​ ఉత్తమ ఆటగాడని తెలిపాడు.

టీమిండియా కెప్టెన్ విరాట్ కోహ్లీకి ఇతర క్రికెటర్లకి ఆటలో చాలా తేడా ఉందని వెస్టిండీస్ క్రికెట్ దిగ్గజం లారా అభిప్రాయపడ్డాడు. నిరంతరం పనిచేసే తత్వం, ఫార్మాట్ ఏదైనా తనదైన శైలిలో సత్తా చాటగలగటమే విరాట్​ని అందరికంటే భిన్నంగా నిలబెట్టిందన్నాడు.

కోహ్లీ ఆట తీరే అతడిని టీమిండియా కెప్టెన్ స్థాయికి తీసుకెళ్లిందని లారా తెలిపాడు. డీవై పాటిల్ యూనివర్సిటీ నుంచి డాక్టరేట్ అందుకున్నాక తన భావాలను పంచుకున్నాడు. ఈ సందర్భంగా క్రికెట్​లో తన తొలి రోజులని, సచిన్​తో అనుబంధాన్ని గుర్తుచేసుకున్నాడు.

"విరాట్ ఎంత మంచి ఆటగాడైనా.. నా దృష్టిలో ఎప్పటికీ సచినే బెస్ట్. ప్రస్తుతం మిగిలిన ఆటగాళ్లకి కోహ్లీకి చాలా తేడా ఉంది. రోహిత్ శర్మ వరల్డ్ కప్​లో నాలుగు సెంచరీలు చేసినప్పటికీ... టీట్వంటీ, టీ10, టెస్ట్ క్రికెట్.. పిచ్ ఏదైనా విరాట్ భిన్నంగా రాణిస్తాడు".
- లారా, వెస్టిండీస్ క్రికెట్ దిగ్గజం

సచిన్ అత్యున్నత క్రికెటర్​ అని కితాబిచ్చాడు లారా. ప్రస్తుతం భారత ఆటగాళ్లు రాణిస్తున్నారంటే అందుకు కారణం మాస్టరేనని అభిప్రాయపడ్డాడు.

'ఆటలో సచిన్ ముద్ర ఎప్పటికీ చెరిగిపోనిది. ఎలాంటి పిచ్​నైనా ఎంతో తేలికగా అలవాటుచేసుకోగలడు. క్రికెట్​లో సచిన్ ఓ వంతెనని నిర్మించాడు. ప్రపంచంలో ఏ మైదానంలో అయినా భారతీయ క్రికెటర్లు ఇంత బాగా ఆడగలుగుతున్నారంటే అందుకు కారణం సచిన్ నేర్పిన పాఠాలే. చెప్పాలంచే ప్రతీ ఆడగాడు సచిన్ అనే పుస్తకం నుంచి పేజీని చించి తెచ్చుకున్నవాళ్లే'. - లారా, వెస్టిండీస్ క్రికెటర్

వెస్టిండీస్ ప్రపంచ కప్ నుంచి నిష్క్రమించే సమయం వచ్చిందని.. ప్రతీ టీమ్ ముందుకు వెళ్తుంది కానీ కరీబియన్స్ ఆటలో పురోగమనం లేకపోవటం దురదృష్టకరం అని ఆవేదన వ్యక్తం చేశాడు లారా.

ఇది చదవండి:దూరం తరుగుతుంటే.. గారం పెరుగుతుంటే...