"క్రికెట్ బ్యాట్స్మెన్ గేమ్.." అంటూ విమర్శలు వినిపిస్తుంటాయి. ఆదివారం ప్రపంచకప్ ఫైనల్ చూస్తే అది నిజమే అనిపిస్తుంది. బ్యాటింగ్ చేయలేకో, బౌలింగ్లో విఫలమయ్యో, ఫీల్డింగ్ లోపమో అయి ఓడితే అర్థముంది. కేవలం బౌండరీల ఆధారంగా విశ్వవిజేతను నిర్ణయించడంపై నెటిజన్లు మండిపడుతున్నారు. ఇంగ్లాండ్ - న్యూజిలాండ్ మధ్య జరిగిన ఫైనల్లో బౌండరీ కౌంట్ ద్వారా విజేతను ప్రకటించారు.
"బౌండరీల అంతరమే కివీస్కు ప్రపంచకప్ దూరం చేసింది" అంటూ సామాజిక మాధ్యమాల్లో పోస్ట్లు పోటెత్తుతున్నాయి. "వాళ్లు (ఇంగ్లాండ్ బ్యాట్స్మెన్) బౌండరీలు ఎక్కువ కొట్టారు సరే.. న్యూజిలాండ్ ప్రత్యర్థిని ఆలౌట్ చేసింది కదా" అంటూ కివీస్కు అనుకూలంగా కామెంట్లు పెడుతున్నారు. ఐసీసీ నిబంధనలపై ఘాటుగా స్పందిస్తున్నారు.
ఈ నిబంధనను మాజీలు సైతం తప్పుపడుతున్నారు. ఆసీస్ మాజీ ఆటగాడు బ్రెట్ లీ దీనిపై స్పందించాడు. "ఈ విధంగా విజేతను నిర్ణయించడం దారుణం" అంటూ ట్వీట్ చేశాడు.
వారిద్దరి బౌండరీలే కివీస్కు కప్పు దూరం చేశాయా..?
ఇంగ్లాండ్కు ప్రపంచకప్ను అందించడంలో కీలకపాత్ర పోషించింది బెన్ స్టోక్సే. కానీ బౌండరీ కౌంట్ ద్వారా వరల్డ్కప్ అందించింది మాత్రం బెయిర్స్టో, బట్లర్లే. వీరిద్దరే 13 బౌండరీలు బాదారు. బెయిర్ స్టో 55 బంతుల్లో 36 పరుగులు చేశాడు. అందులో ఏడు ఫోర్లు ఉన్నాయి. బట్లర్ 60 బంతుల్లో 59 పరుగులు చేశాడు. ఇందులో ఆరు ఫోర్లు ఉన్నాయి. ఇంగ్లాండ్ కొట్టిన మొత్తం బౌండరీలు 26 ( 23 ఫోర్లు, 3 సిక్సర్లు) బౌండరీల్లో సగం (13) వీరిద్దరే కొట్టారు. ఈ బౌండరీల అంతరమే న్యూజిలాండ్కు ప్రపంచకప్ను దూరం చేసింది. కివీస్ ఖాతాలో 17 బౌండరీలే ఉన్నాయి.
ఆలౌట్ను లెక్కలోకి తీసుకోలేదు..