'నాలుగులో పంత్ సరైన నిర్ణయమే'

ఇంగ్లాండ్​తో మ్యాచ్​లో పంత్ నాలుగో స్థానంలో బ్యాటింగ్​కు పంపడం సరైన నిర్ణయమే అని టీమిండియా వైస్ కెప్టెన్ రోహిత్ తెలిపాడు. విజయ్ శంకర్ గాయం కారణంగానే పంత్​కు అవకాశమిచ్చామని స్పష్టం చేశాడు.

ఇంగ్లాండ్​తో జరిగిన పోరులో భారత్ ఓటమిపాలైంది. ఈ మ్యాచ్​లో విజయ్ శంకర్ స్థానంలో పంత్​కు అవకాశం దొరికింది. నాలుగో స్థానంలో బ్యాటింగ్​కు దిగాడు. అయితే ఆడిన మొదటి మ్యాచ్​లోనే రిషభ్​ నుంచి భారీ ఇన్నింగ్స్​ ఆశించడం మంచిది కాదని టీమిండియా వైస్​ కెప్టెన్ రోహిత్ శర్మ అన్నాడు.

ఇంగ్లాండ్​కు చావోరేవో మ్యాచ్​.. అదీ టీమిండియాతో.. ప్రపంచకప్​లో హాట్​ ఫేవరేట్​గా బరిలోకి దిగింది మోర్గాన్ సేన. అనూహ్య ఓటములతో సెమీస్​ ఆశలు సంక్లిష్టం చేసుకుంది. భారత్​పై గెలిచి సెమీస్​ అవకాశాలు మెరుగ్గా ఉంచుకోవాలని భావించిన ఇంగ్లాండ్​ జట్టు అదే రీతిలో ఆడింది. అయితే ఈ మ్యాచ్​లో విజయ్ శంకర్​ స్థానంలో పంత్​కు చోటు లభించింది. టీమిండియాకు ఎప్పటి నుంచో ఆందోళన కలిగిస్తోన్న నాలుగో స్థానంలో రిషభ్ బ్యాటింగ్​కు దిగాడు. భారత్ గెలిస్తే ఎలా ఉండేదో కానీ.. కోహ్లీ సేన ఓటమి తర్వాత ఈ స్థానంపై మరోసారి చర్చ మొదలైంది.

మ్యాచ్ అనంతరం పంత్ నాలుగో స్థానంలో బ్యాటింగ్​కు రావడంపై ఓ విలేకరి రోహిత్​ను ప్రశ్నిస్తూ.. అంత కఠిన పరిస్థితుల్లో పాండ్యను కాదని పంత్​కు నాలుగో స్థానంలో బ్యాటింగ్​కు పంపడం ఆశ్చర్యకరంగా అనిపించ లేదా అని అడిగాడు. దీనిపై రోహిత్ స్పందిస్తూ..

"ఆశ్చర్యకరం అనిపించలేదు. ఎందుకంటే మీరంతా పంత్​ను నాలుగో స్థానంలో చూడాలనుకున్నారు. టీమిండియా అభిమానులు కూడా రిషభ్ పంత్​ ఎక్కడ? అంటూ ప్రశ్నించారు. ఈ ప్రశ్నలన్నింటికీ ఈ మ్యాచ్​ సమాధానం" అని తెలిపాడు.

"పంత్​ భారీ షాట్స్​ ఆడే ముందు మరింత ఆలోచించాలి. ప్రపంచకప్​లో పంత్​కు ఇది మొదటి మ్యాచ్​మాత్రమే. ఈ దశలో అతడి నుంచి భారీ ఇన్నింగ్స్​ ఆశించడం కూడా మంచిది కాదు. మిడిల్​లో ఇంకాస్త సమయం వెచ్చించాలి. పిచ్ పరిస్థితులను అంచనా వేయాలి. రిషభ్​ను నాలుగో స్థానంలో పంపడం సరైన నిర్ణయమే. అతడి ప్రతిభ అందరికీ తెలుసు".
-రోహిత్, టీమిండియా వైస్ కెప్టెన్

గాయం కారణంగానే విజయ్ శంకర్ జట్టుకు దూరమయ్యాడని అన్నాడు రోహిత్. కుల్దీప్, చాహల్​కు కలిసిరాలేదని.. వారు మరింత మంచి ప్రదర్శన కనబర్చగలరని తెలిపాడు.

ఇవీ చూడండి.. 'టీమిండియా ఓటమికి ఆరెంజ్​ జెర్సీనే కారణం'