ప్రపంచకప్ గెలిచేందుకు భారత్కు మరో రెండు అడుగుల దూరం మాత్రమే ఉంది. నేడు సెమీస్లో కివీస్తో సమరానికి సిద్ధమైంది. మాంచెస్టర్ వేదికగా మధ్యాహ్నం 3 గంటలకు మ్యాచ్ ప్రారంభం కానుంది.
కప్పు కొట్టడమే లక్ష్యంగా ఈ మెగాటోర్నీలో అడుగుపెట్టింది కోహ్లీసేన. అందుకు తగ్గట్టుగానే ప్రదర్శన చేస్తూ వచ్చింది. 9 మ్యాచ్ల్లో 7 మ్యాచ్ల్లో గెలిచి, ఇంగ్లాండ్పై మాత్రమే ఓడింది. న్యూజిలాండ్తో ఆడాల్సిన లీగ్ మ్యాచ్ వర్షం కారణంగా రద్దయింది. ఇప్పుడు ఎలాగైనా ఆ జట్టును ఓడించాలని భారత్ తపిస్తోంది.
వరుస విజయాలు నమోదు చేసి టీమిండియా ఉత్సాహంతో ఉండగా, గత 3 మ్యాచ్ల్లోనూ ఓటమిపాలైంది కివీస్. ఈ రోజు గెలిచి ఫైనల్లో అడుగుపెట్టాలని ఇరుజట్లు భావిస్తున్నాయి. కానీ ఆ అవకాశం ఎవరికి దక్కుతుందో చూడాలి.
టీమిండియా
భారత్ ఓపెనింగ్ జోడి రోహిత్ శర్మ (647)- రాహుల్ (360) అద్భుతంగా రాణిస్తున్నారు. ఇప్పటికే రోహిత్ అత్యధిక పరుగులు చేసిన వారిలో అగ్రస్థానంలో ఉన్నాడు. కెప్టెన్గానే కాకుండా బ్యాటింగ్లోనూ ఆకట్టుకుంటున్న కోహ్లీ.. ఈ ప్రపంచకప్లో 442 పరుగులు చేశాడు. వీరు ముగ్గురూ మరోసారి చెలరేగితో టీమిండియా గెలుపు నల్లేరుపై నడకే.
భారత్ను వేధిస్తోన్న సమస్య మిడిలార్డర్. టాప్ ఆర్డర్ విఫలమైతే సరైన భాగస్వామ్యాలు నిర్మించలేకపోతున్నారు. పాండ్య అనుకున్నంతగా ఆడలేకపోతున్నాడు. ధోని నెమ్మదిగా ఆడుతున్నాడు. మరి ఈ మ్యాచ్లో వాటికి భారత్ చెక్ పెడుతుందేమో చూడాలి.
బౌలింగ్ విభాగానికొస్తే బుమ్రా అత్యుత్తమ ప్రదర్శన కనబరుస్తున్నాడు. అతడికి తోడుగా షమి, భువనేశ్వర్ రాణిస్తే టీమిండియా ఫైనల్లో అడుగుపెట్టడం చాలా తేలిక. ఈ మ్యాచ్లో వీరికి తోడుగా స్పిన్నర్లలో కుల్దీప్, చాహల్లో ఒకరికి అవకాశం దక్కొచ్చు.