ప్రపంచకప్లో భాగంగాబంగ్లాదేశ్తో జరుగుతున్న మ్యాచ్లో ఆస్ట్రేలియా భారీ స్కోరు చేసింది. నాటింగ్హామ్ వేదికగా జరుగుతున్న ఈ మ్యాచ్లో 50 ఓవర్లలో 5 వికెట్లు కోల్పోయి 381 పరుగులు చేసింది. డేవిడ్ వార్నర్(166, 147 బంతుల్లో) శతకంతో రెచ్చిపోగా.. ఖవాజా(89), ఆరోన్ ఫించ్(53) అర్ధశతకాలతో ఆకట్టుకున్నారు.
బంగ్లా బౌలర్లు.. ఆసీస్ బ్యాట్స్మెన్ను కట్టడి చేయలేక ధారాళంగా పరుగులు సమర్పించుకున్నారు. సౌమ్యా సర్కార్ మూడు వికెట్లు తీయగా.. ముస్తాఫిజుర్ ఓ వికెట్ తన ఖాతాలో వేసుకున్నాడు.
టాస్ గెలిచి బ్యాటింగ్ ఎంచుకున్న ఆసీస్కు శుభారంభం దక్కింది. ఓపెనర్లు వార్నర్- ఫించ్ 121 పరుగుల భాగస్వామ్యాన్ని నెలకొల్పారు. నిలకడగా ఆడుతూ స్కోరు వేగాన్ని పెంచారు. అర్ధశతకం చేసి సౌమ్యా సర్కార్ బౌలింగ్లో ఔటయ్యాడు ఫించ్.
శతకంతో రెచ్చిపోయిన వార్నర్
నిదానంగా ఇన్నింగ్స్ ప్రారంభించిన డేవిడ్ వార్నర్ అనంతరం తనదైన శైలిలో దూకుడు పెంచాడు. 110 బంతుల్లో సెంచరీ పూర్తి చేసుకుని కెరీర్లో 16వ శతకాన్ని నమోదు చేశాడు. వంద పరుగుల మైలురాయి తర్వాత మరింత విజృంభించాడు . ఎడాపెడా బౌండరీలు, సిక్సర్లు బాదుతూ బంగ్లా బౌలర్లకు చుక్కలు చూపించాడు. 147 బంతుల్లో 166 పరుగులు చేసి సౌమ్యా సర్కార్ బౌలింగ్లో రుబెల్కు క్యాచ్ ఇచ్చాడు.