డక్‌వర్త్‌ లూయిస్‌ ప్రకారం 187 పరుగుల లక్ష్య ఛేదనతో బరిలోకి దిగిన అఫ్గాన్ను 32.4 ఓవర్లకు 152 పరుగులకు పరిమితం చేసింది శ్రీలంక. నువాన్ ప్రదీప్ (4/31), లసిత్‌ మలింగ (3/39) అద్భుతమైన బౌలింగ్‌తో ప్రత్యర్థిని కట్టడి చేశారు. నజీబుల్లా (43; 56 బంతుల్లో 6×4) చివరి వరకు పోరాడాడు. హజ్రతుల్లా (30), గుల్బదిన్‌ నయీబ్ (23) ఫర్వాలేదనిపించారు. అంతకు ముందు కుశాల్ పెరీరా (78; 81 బంతుల్లో 8×4), కరుణరత్నె (30; 45 బంతుల్లో 3×4) అదరగొట్టడంతో 36.5 ఓవర్లకు లంక 201 పరుగులు చేసింది. వర్షం కారణంగా మ్యాచ్ను 41 ఓవర్లకు కుదించారు. 4 వికెట్లతో సత్తా చాటిన నువాన్ ప్రదీప్కు 'ప్లేయర్ ఆఫ్ ద మ్యాచ్' దక్కింది.
57 పరుగులకే 5 వికెట్లు...
187 పరుగుల లక్ష్యంతో మైదానంలోకి దిగిన అఫ్గాన్ జట్టు ఆరంభంలో ఓవరుకు కనీసం ఒక బౌండరీ బాదింది. విధ్వంసకర బ్యాట్స్మెన్ షెహజాద్ ఔట్ అవ్వడం వల్ల ఒత్తిడికి గురైంది. పరిస్థితిని తమకు అనుకూలంగా మలుచుకున్న లంకేయులు బౌన్సర్లతో విరుచుకుపడ్డారు. దీంతో వెంట వెంటనే వికెట్లు కోల్పోయి కష్టాల్లో పడింది అఫ్గాన్. రన్ రేట్ క్రమంగా తగ్గిపోయింది. హజ్రతుల్లా జజాయ్ 30 పరుగులు చేశాడు.